Uranimut akerliusut aatsitassalerisussanngorput
Suliniutilli akuerineqarnissaanut atuuffiit akuersissuteqartussat ataasinngormat naalakkersuisuni nikititerisoqarneratigut maanna illuatungeriinnit Naalakkersuisuuffigineqalerput.
Inuit Ataqatigiinniit Múte Bourup Egede Aatsitassanut Ikummatissanullu naalakkersuisuuvoq, taamatullu Partii Naleqqamiit Hans Enoksen Inuussutissarsiornermut Suliffeqarnermullu naalakkersuisuulerluni, tassa suliamut akuersisinnaatitaanissamut maanna akisussaaffeqalerput.
Nunatsinni aatitassarsiornermut tunngasut naalakkersuisoqarfinnit pingasunik suliarineqartarput. Kim Kielsenillu avatangiisunut tunngasut maanna naalakkersuisuuffigilerpai taamaalilluni akuersinerit isumagisartussanngorlugit.
Naalakkersuisut Narsami Kuannersuarni aatsitassarsiornissamut pilersaarusiaq attatinnassallugu maannamut aalajangiusimavaat, taamaattorli uranitalinnik aatitassarsiorsinnaaneq pillugu isumaqatigiinngissuteqarsinnaassallutik isumaqatigiissutigalugu.
Sulisitsisut uranimut naaggaaratilluunniit anginngillat, oqarlutilli aalajangernerit inatsimmut naapertuuttariaqartut politikerit isummertarnerannut pinnatik.
AAMMA ATUARUK Nunatsinni aatsitassarsiornerup siunissaa Sulisitsisut ernumagaat
Taammaammat aatsitassarsiornermik ingerlateqatigiiffiit sumi inissisinertik ilisimaarisariaqaraat GE isumaqarpoq:
- Kalaallit Nunaannut aningaasaliiniartut, soorlu GME allallu, sinaakkutitut piumasaqaatit qanoq ittuuneri ilisimassagaat, piumasaqaatillu naalakkersuisoqatigiinnit naalakkersuisoqatigiinnut allanngorannginnissaat, uagut soqutigisaraarput, Sulisitsisut pisortaat, Brian Buus Pedersen oqarpoq.
AAMMA ATUARUK Danskit politikkerii Nunatta aatsitassarsiornikkut ineriartornissaanut akorngutaasut
Taassuma erseqqissaatigaa Naalakkersuisut sumut siunnerfeqarnerlutik ersarissumik nalunaaruteqarnissaat pingaaruteqartoq:
- Aatsitassarsiornerup tungaatigut nunatsinni nalornissuteqartoqarpat aningaasaliisussat atorfissaqartitagut aannaasinnaavagut. Tassa aatitassiorniarnerup aserorneqarnissaa ernummatigisaraarput,))
Sulisitsisut pisortaat Brian Buus Pedersen taama oqarpoq.
Suliniutik suliarineqarnissaa qanoq qulakkerneqarnisa pillugu, Inuussutissarsiornermut, Sulisoqarnermut, Niuernermut Nukissiuuteqarnermullu naalakkersuisoq Hans Enoksen kiisalu Aatsitassanut Ikummatissanullu naalakkersuisoq Mute B. Egede oqaaseqartinniarsimagaluarpagut sulili oqaaseqarsinnaanngikkallarnerarput.
