Uranimik piiaanissaq pillugu akerliupput
Sisamanngornermi januaarip ulluisa 29-anni unnukkut nalunaaqutaq arfineq-marlunut Narsap katersortarfiani ataatsimiittoqassaaq.
– Misigisimavugut Kuannersuarni uranimik piiaanermi peqqissutsikkut avatangiisinullu kinguneqaatissanik naammattumik paasissutissinneqarsimanata, suliniuteqartut ilaat Kalistat Lund Sermitsiamut oqarpoq.
Nanortalimmi Juulli sioqqullugu ataatsimiinnermi ikaarsaariarnermut ataatsimiititaliap isumaqatigiissup oqaaseqaat akuersissutigaa, tassani ilaatigut tikkuarneqarluni peqqissutsimut avatangiisinullu ulorianartoqarnera ilaatigullu uranimik piiaanermi kinguneqaatissanik paasissutissiinnginnerit.
– Uranimik piiaanerup nunani allani piiaaffiup eqqaani inuiaqatigiinnut ajortumik kinguneqaatigisaanik ilisimasanik pissarsiniarnermi innuttaasunik ikiuiniartoqarsimanngilaq, Kujataani politikerit oqarput.