"Uranilerinermi naqqaniit aallatissaagut"
Uran pillugu immikkut ilisimasalik, Nunani tamalaani naalakkersuinikkut pissutsit pillugit danskit ilisimatusarfianni, DIIS-imi, ilisimatujusoq, Cindy Vestergaard, sammisaqaqatigiinnermi aaqqissuisuuvoq.
- Suleqatigiinneq Narsarsuarmi ingerlanneqarpoq, aallarteqqammivugut. Oqallippugut misilittakkagullu isumannaallisaanermut, avatangiisinik illersuinermut, inatsisillu nuanarsuarmiut atugaat ilanngullugit eqqartorlugit. Tamarmik uran-imut tunngasut, Cindy Vestergaard oqarpoq.
Ataatsimiinneq matoqqasuuvoq, aggersagaasut tassaapput nunatsinneersut Danmarkimeersullu, uranimik arlaatigut suliaqartut suliaqarsimasulluunniit.
Aamma Canadamiut avatangiisit pillugit siunnersortit, uranimik piiaanermut tunngasumik suliaqarsimasut qaaqqusaapput, soorluttaaq Australiamiu atorfiliusimasoq, aamma uranimik isumannaallisaanermik misilittagalipilussuaq qaaqqusaasoq.
Uranimut tunngasunik misilittakkat Naalagaaffeqatigiinni amigaataaqaat, taamaammalluuna massakkut sammisaqaqatigiissitsisoqartoq, Cindy Vestergaard oqarpoq.
- Naalagaaffeqatigiinermi massakkut taamaappoq. Urani pillugu naqqaniit aallartippugut, Kalaallit Nunaanni pisariaqartinneqartumik uranip avammut tunisassiarineqarnissaa pillugu suli inatsiseqanngilaq. Immikkut ingerlatsinermut allaffeqarfiliortoqartariaqarpoq, uranip avammut tunisassiarineqarnissaanik aqutsisussamik, Cindy Verstergaard oqarpoq.
Narsarsaurmi ataatsimiinneq sapaatit akunnerannik sivisussuseqassaaq uranimullu tunngasunik arlaatigut akisussaaffeqaleriaannaasut 30-nik amerlanerusut suliaqaqatigiinnermi peqataapput.
