Urani pillugu oqallinnissaq assortuussutaaqisoq kinguartinneqarpoq

Inatsisartulli Siulittaasoqarfiat ippassaq ualikkut nalunaarpoq oqallinnissaq assortuussutaasimaqisoq sisamanngorpamut kinguartinneqartoq, aappassaaneerneqarnissaalu oktobarip 24-iani pissasoq.

Inatsisartunut ilaasortat taamaasillutik danskit kalaallillu urani pillugu nalunaarusiaata ippassaq saqqummiunneqartup atuarnissaanut ullunik marlunnik periarfissinneqarput.

Oqallisigineqarnissaa ilaatigut Inuit Ataqatigiinnit kinguartinneqarnissaa kissaatigineqarsimavoq, urani pillugu nalunaarusiap Inatsisartuni oqallisigineqarnissaa sioqqullugu atuarnissaanut piffissakippallaarnerarlugu.

Sisamanngorpamullu kinguartinneqarneratigut politikerit nalunaarusiap atuarnissaanut ullunik marlunnik maanna periarfissaqalerput.

Nuummi ullumi nalunaaqutap ataatsinut qiteqquppat akerliussutsimik takutitsinissaq - partiimit suminngaanneerneq apeqqutaatinnagu sulianiaqatigiiffiup 'Naamik Qujaannarpunga'-p aaqqissuussaa, pilersaarutit malillugit ullumi ingerlanniarneqartoq, aaqqissuisut nalunaarutigaat.

Akerliussutsimik takutitsisut Katerittarfik Amisunit Namminersorlutik Oqartussat allaffeqarfissuanut ingerlaaqatigiinniarput, tamannalu tassa ullumi nalunaaqutaq ataatsip qeqqanut pissaaq.