Urani Inatsisartuni ullumi oqallisigineqassaq
Tamanna aningaasaqarnermut aatsitassanullu naalakkersuisup Randi Vestergaard Evaldsenip Inatsisartunut ilaasortanit nalunaaqutaq qulinut akunnermi ataatsimi apeqqarissaarfigineqareerpat pissaaq.
Nalunaaqutarlu aqqaninngoreerpat, urani pillugu oqallinneq aallartissaaq. Atassummeersup Steen Lyngep aatsitassanik piiaanermi qinngornernut ulorianartunut 0,05 procentinut annerpaaffiliisoqarnissaa pillugu innuttaasunik isumasiuilluni taasisitsisoqarnissaanik Naalakkersuisut peqquneqarnissaannik siunnersuutaa oqallisigineqassaaq.
Steen Lyngeli naapertorlugu siunnersuut Narsap eqqaani Kuannersuarnut tunngassuteqanngilaq, USA-mili Australiamilu uraneqassutsimut qummut killiligitinneqartup assinganik aalajangersaasoqarnissaa kissaatigineqarluni, Steen Lynge aviisimut AG-mut qanittukkut taama oqarpoq.
Atassummit siunnersuut oqaluuserineqareerpat Inuit Ataqatigiinnit siunnersuutigineqartoq sunniuteqarnerusussaq oqallisigineqassaaq, tassalu uranisiornissaq pillugu innuttaasunik taasititsinissamik siunnersuut. Partiip tamatumunnga peqatigitillugu sammisaq pillugu arlaannaanulluunniit attuumanngitsumit paasititsiniaasoqarnissaanik aallartisaasoqarnissaa ujartorpaa.
Partiit illuatungiliuttut Inuit Ataqatigiit siunnersuutaat taperserpaat, Naalakkersuisulli Steen Lyngep Inuit Ataqatigiillu siunnersuutaat itigartippaat, uranimillu piiaanngilluinnarnissamik siorna amerlanerussuteqaqqalaaginnarluni atorunnaarsitsisoqarnera aalajangiusimallugu, aammalu innuttaasunik taasititsinissaq aatsitassarsiornermik suliffissuaqarnermut pitsaanngitsumik nalunaarussasoq tunngavilersuutigalugu.
