Urani ajornartorsiutigaat

Uranimut tunngasunik nunatsinniinnaanngitsoq ulluni makkunani ajornartorsiuteqartoqarpoq.

Nunavummi suliffeqarfik aatsitassarsiornernut akuersissummik peqarnani uranisiorsimanini pillugu, Canadap nunataani aatsitassarsiornissamut siunissami mattunneqarpoq.

Suliffeqarfik pineqartoq tassaavoq, Silver Spruce Resources, taama CBC News allaaserinnippoq.

Nunatsinni pisoq Nunavummi pisumut assinguvoq, Namminersornerullutimmi Oqartussat eqqumiigeqisaannik nittartakkami Australiamiut aatsitassarsiortut nalunaaruteqaqqammerput, suliffeqarfitsik uranisiornissamik uranimillu qalluinissamik Kalaallit Nunaata Kujataani sumiiffinni pingasuni akuerineqarsimallutik.

Aatsitassarsiornermut Pisortaqarfik erngerluni tamanut nalunaarpoq, Australiamiut aatsitassarsiortut uranisiornissamut akuerineqarsimanngisaannartut, Kalaallit Nunaanni uranimik ujarlerneq inerteqqutaammat.