Uran pillugu issittumi isumaqatigiinnginneq
Uran pillugu apeqqut mianersornartorujussuuvoq issittormiut akornanni Kalaallit Nunaanni, Canadami, Alaskami Ruslandimilu. Inuit siuuttui Canada-mi ataatsimiinnerminni uran pillugu isummersornermi isumaqatigiinngitsoorput.
- Uranimik qalluinissaq pillugu issittumi najugallit akornanni avissaarutaavoq. Taamaattumik ataatsimiinnermi ataatsimoorussamik oqaaseqaasiorsinnaasimanngilagut, taama KNRimut oqarpoq Naalakkersuisut siulittaasuat Kuupik Kleist.
Inuilli siuuttuisa isumaqatigiissutigisinnaasimavaat siunissami akuttunngitsumik naapittarnissartik ilaatigut oqallisigineqartassalluni issittumi aatsitassanik atuineq.
- Aatsitassat siunissami aningaasarsiornikkut politikkikkullu sammineqarnerujartuinnartussaapput. Taamaattumik pingaaruteqarpoq issittumi najugallit malinnaaqqissaarnissaat issittumi najugallit inissisimanerat soqutigisaallu pitsaanerusumik illersorneqarsinnaaniassammata, taama Kuupik Kleist oqarpoq.