VIDEO Uran pillugu Danmarki akisussaaffeqassaaq
Kalaallit Nunaat siuniussami uranimik tunisassiulernissaanut sinaakkutissanik Naalakkersuisut aamma danskit naalakkersuisui isumaqatigiissuteqarsimanerat, danskit nunanut allanut tunngasunut ministeriata Kristian Jensenip pisortatigoortumik ippassaq saqqummiuppaa.
Aamma atuaruk Uran pillugu mianersortoqarnissaa Olsvigip nalunaarutigeqqippaa
Isumaqatigiissuteqarnermi erseqqissarneqarput, akisussaaffiit sorliit Danmarkimit tigummineqartut aamma Namminersorlutik Oqartussaanit akisussaaffigineqartut, taakkua Inuussutissarsiornermut, Suliffeqarnermut Niuermullu Naalakkersuisup Randi Vestergaard Evaldsenip ima nassuiarpai:
- Danmarkip nunanut allanut aamma sillimaniarnermut tunngasortai akisussaaffigai taakkualu Kalaallit Nunaannut pingaaruteqarmata isumaqatiginniarnermi piffissaq sivisooq atorneqarsimavoq, Randi Vestergaard Evaldsen oqarpoq.
Uran avammut tunisassiarineqartussaq siunertanut ajunngitsunut atorneqarnissaa qulakkeerneqassaaq.
Aamma atuaruk Nunatta Danmarkillu uranimik avammut niuernissaq isumaqatigiissutigaat
- Uran Kalaallit Nunaannit avammut tunisassiarineqartoq naalagaaffinnut sorsuffiunngitsunut inuiaqatigiinnilu ajunngitsumik siunertaqartumik atorneqarnissaa qulakkeerneqassaaq, Randi Vestergaard Evaldsen oqarpoq.
Isumaqatigiissuteqarnermi qulakkeerneqanngitsunut ilaavoq Atomimik nukissiorneq pillugu nunat tamalaat nakkutilliisuutitaanut nalunaaruteqartarnissaq kiap akissussaaffigissaneraa, taamaalilluni uran avamamut tunineqartoq peqqarniisaarnianut aamma naalagaaffinnut kisermaassilluni naalakkersuisuutitaqartunut tunineqannginnissaa qulakkeerneqassammat.
Suliassaq taanna Danmarkip isumagissagaa Randi Vestergaard Evaldsen oqarpoq.
- Danmarkip nalunaaruteqartarnissaq isumagissavaa, Kalaallit Nunaat qanimut suleqatigilluinaqqissaarlugu, Suliffeqarnermut Niuermullu Naalakkersuisoq oqarpoq
Aamma atuaruk Kuannersuarni aatsitassarsiorneq inuussutissarsiornermik innarliissanngilaq
Uran avammut tunissarsiarineqartoq sumut atorneqarniarnersoq aamma nunamut sumut tunineqarnersoq nunatsinni malinnaavigeqqissaarneqassaaq soorluttaaq nunani allani uranimik tunisassiortuni taama ittartut.
- Uranip avammut tunissassiarineqartup nalunaarsuiffianik database-mik nunatsinni peqassaaq, uran grammi ataaserluunniit sumut ingerlaarnersoq malinnaavigineqaqqissaassaaq, Randi Vestergaard Evaldsen oqarpoq, nunani allani tamanna iluatsittumik ingerlanneqarsinnaappat tamanna aamma nunatsinni iluatsinnaavoq,
Inuussutissarsiornermut, Suliffeqarnermut Niuermullu Naalakkersuisoq Randi Vestergaard Evaldsen taama oqarpoq.
Kalaallit Nunaata Danmarkillu isumaqatigiissutaat sapaatit akunnerini tulliuttuni pisortatigoortumik saqqummiuneqassasoq Inuussutissarsiornermut, Suliffeqarnermut Niuermullu Naalakkersuisoqarfimmit nalunaarutigineqarpoq.