Uppik Narsarsuarmut tikeraartoq
Tassami ulluni makkunani uppimmik allaalaartumik tikeraartoqarput – tassa uppimmik nunatsinneersuunngitsumik, kisianni tikeraartorisaat tassaalluni uppik kajortoq.
- Uppik qasersuuvoq qernertunik milalik tulukkamillu minnerulaarluni. Aamma allaalaartumik timmisarpoq. Taamaattumik takuneq ajoratta eqqumiigilaarparput, Narsarsuarmi mekanikeri timmisartulerisoq Niels Henrik Isbosethsen oqaluttuarpoq.
Taassuma uppimmik takusimasut arlallit oqaloqatigisimallugit oqarpoq. Tassa ullut tallimat matuma siornagut uppik takoqqaarneqarpoq. Siornatigullu uppimmik taamaattumik Narsarsuarmi takusaqartoqarsimanngilaq.
Niels Henrik Isbosethsenip ilimagaa ulluni makkunani Narsarsuarmi teriaqarluarnerata uppik qaninngoortilersimassagaa.