Upperisarsiortut assigiinngitsut siuttui Qassiarsummiittut

Silap kiatsikkiartuinnarnerata qanoq iliuuseqarfigineqarnissaa, nunarsuarmi assigiinngitsunik upperisallit siuttuisa tamarmik pingaarteqigaat, nunatta biskoppia Sofie Petersen umiarsuarmi Fram-imi angalaqataasoq oqarpoq.

Umiarsuarmi Fram-imi ilaasut upperisarsiortut siuttui, tusagassiortut assiliisullu 200-t sinneqartut ullaaq gummibåd-it atorlugit Qassiarsummut ikaassorneqarmata, kingulliulluni Griikerit Romamiullu kristumiut Orthodoksit qullersaat Bartholomæus niummat Qassiarsummi ajoqi Erik Røde Frederiksen tikilluaqqusisuuvoq.

Tamatuma kingorna Tjohilde-p oqaluffiata inissisimaffiani qinoqatigiinneq ingerlanneqarpoq, kujataani palasit, upperisarsiortut siuttui nunanit tamalaaneersut, Qassiarsummiut, tusagassiortut nunanit tamalaaneersut allallu peqataaffigisaannik.

- Nunatsinni angalaneq nunarsuaq tamakkerllugu tusagasssiorfinnit soqutigineqaqimmat, silap kiatsikkaluttuinnarneranut akiuiniarnermut sunniuteqarsimassallutik nunatta biskoppiata Sofie Petersenip ilanngullugu oqaatigaa.

Upperisarsioqatigiit assigiinngitsut Qassiarsummiinerat pillugu unnugu Qanoruumi ilanngutassiisoqassaaq.