Upernaviup nutaartaata sanaartorfigiuminarsarnissaanut aningaasaliinissaq itigartinneqarpoq

-Aningaasat taakkununnga immikkoortitat ima killeqartigipput ataqatigiissaarneqartariaqarlutik. Kisianni isumaqarpunga nunap ataatsimut ineriartortinnera apeqquserneqarsinananngitsoq, aamma massakkut sapinngisarput tamaat taamatut ingerlatsivugut. Assersuutigiinnarlugu Upernaviup Kommuneani illuliassat sananeqartartut amerlanerpaat Upernaviup Kommuneanut tunniunneqartarput, taassumalu saniatigut aamma Upernaviup Kommuneani nunaqarfinni atuarfiit aaqqissuunneqarput, tassa nuna ataatsimut isigalugu pisariaqartitsinerusut tunngavigalugit ineriartortitsisoqarnera apeqquserneqarsinnaannginnasoraara, Hans Enoksen oqarpoq, nangipporlu:

-Allaalluunniit illoqarfissuarnik taaneqartartut, Nuuk Sisimiut, Ilulissat allallu, allaat Namminersornerullutik Oqartussaninngaaniit sumiginnarneqartutut misigisimajuaannarput, sanaartorfigissaanermut aningaasaliissutit amigangaarmata, uffalu taakkunani inissaaleqisut Kalaallit Nunaanni amerlanerpaat ineqartinneqaraluartut, taamaammat tassuunaannarluunniit takuneqarsinnaavoq nuna ataatsimoortumik ineriartortikkusunneqartoq, aamma nunap sinneraniittut malinnaatinneqartariaqartut, tassa illoqarfissuarni najugallit, aammalu kommunemut ilaasortat, oqariartuutigiuartarpaat Namminersornerullutik Oqartussaninngaaniit sumiginnarneqartutut misigisimallutik, tassuuna takusinnaavarput nuna ataatsimut ineriartortinniarneqartoq. Pisariaqartitsineq annertugaluaqisoq, Upernavikkut isorliunerusullu allat, ineriartornermi malinnaatinneqarnissaat pingaartinneqartorujussuuvoq, Hans Enoksen oqarpoq.

Upernavimmi illoqarfiup immikkoortortassaani sanaartorfigiuminarsaanermut Inatsisartut aningaasaliinissaat, Kommuneqarfik Upernaviup ukiuni arlaqartuni qinnutigisaraluarpaa, sulili ilutsinngitsumik, borgmester Jens Immanuelsen Radioavisimut oqarpoq.