Upernavimmiut inuerusagaaniartutut misigipput
Arctic Umiaq Linep sinersortaatai siornakkunnili avannamut Ilulissanut killiinnartalerput, timmisartumillu angalaniaraanni, issiaviit Uummannamukartut Qaanaaliartullu peqatigalugit agguarneqartariaqartarput.
- Inuerusagaaniartugununa, Upernavimmi atuisut siunnersuisoqatigiivini siulittaasoq Samuel Mørch aperivoq.
- Naluneqanngitsutut aasaanerani umiarsuaqassaarnerata ilutigisaanik pissutsit kipiluttunartutut innuttaasuninngaanniit oqallisigineqarnerat tusarnaaginnarneqarsinnaanngilaq. Siornatigut suliniutit kinguneqanngimmata nilliaatigeqqinnissaa pisariaqartilersimavarput, Samuel Mørch oqarpoq.
Oqaatigigaa assaanerinnaaniluunniit angallaffiullualernerata nalaaniluunniit umiarsuarmik sinersortaammik tikinneqartarnissartik pisariaqartinneqartoq.
- Kisianni nilliaatigiuagarput pillugu ajoraluartumik tusaanngitsuusaarneqartutut pineqartarnerput qatsulluinnarparput, atuisut siunnersuisoqatigiivini siulittaasoq oqarpoq.
Innuttaasut angalanissaminut utaqqipiloortitaasarput allaallu ulorianartorsiorlutik ungasissumut nammineq angalasariaqartarlutik.
- Ataasiakkaat timersortartullu aamma tikeraat ilaatigut aqquuteralaat atorlugit imarsuaq imaannaanngitsumik atugassaqartitsisartoq aqqutigisarpaat. Sigguk Upernaviup Uummannallu akornaniittoq uiamallugu siumut utimullu aqqut imaannaanngitsoq atortarpaat, Samuel Mørch oqarpoq.
Innuttaasut apersortittunuinnaanngitsoq aammali ilaqutsiarlutik allatulluunniit aasaanerani angalanissartik pisariaqartittarpaat.
- Kalaallit ileqqoraarput ilaquttagut qanilaarfigissallugu tikeraassallugit. Timmisartoq ilaatigut nuannarineqaannartanngilaq, nangiartoqartarmat, taamaammat aqqutaani sinersorusuttoqartarpoq, oqarpoq.
Sinersortaatinit tikinneqartarneq angalasinnaanerlu Upernavimmi eqqaanilu najugallit maqaasivaat.
- Soorlulu inuerusagaaniartugut, tamanna ilaatigut innuttaasuninngaannit oqaatigineqartarpoq, Samuel Mørch naggasiivoq.
Upernaviup kommunea ullumikkut 2.900-t missaanniittunik inoqarpoq. Oqartussanit oqaaseqartitsiniaraluaratta iluatsitsinngilagut.
