Upernavimmiuaqqat nutaamik ornittagartaalerput
Meeqqat inuusuttuaqqallu ornittagaanni, ataatsimoorfiusunilu pioreersuni,
peqataaneq ajortut attaviginiarneqassapput, suliniaqatigiiffiup Red Barnetip ataqatigiissaarisua, Dorrit Hermann, aviisimit AG-imit apersorneqartilluni taama oqarpoq.
Meeqqat inuusuttuaqqallu akornanni imminut toqunnerit Upernavimmi ungasinngitsumi aqqusaarneqarput, tamannarpiarlu pissutigalugu inuusuttuaqqat meeqqallu ornittagassaannik pilersitsiniarput.
Meeqqat inuusuttuaqqallu arfineq marlunniit 18-it tikillugit ukiullit ornittagassaannik pilersitsinissaq siunertarineqarpoq, tassanilu oqartussaaqataaneq tunngavigineqassaaq meeqqat inuusuttullu tusarnaarneqassallutik.
Meeqqat inuusuttuaqqallu ornittagassaata ukiup siulliup ingerlanneqarnera suliniaqatigiiffiup Red Barnetip isumagissavaa, tamatuma kingorna kommunimit tigujartuaarneqassalluni.