Upernavimmi qaleralinniarneq unitsinneqassaaq
Umiatsiaararsorluni aalisartunut qaammammoortumik qaleralittassiissutit tamakkerneqalernerannik tamanna peqquteqarpoq.
Ulloq marsip ulluisa 19-iat taamatut aamma umiatsiaaqqanut tunitsiviussaaq kingulleq. Neriuutissaqarporli.
Aalisarnermi 450 tonsinik qaammammut pisassiissutilerlugu apriilip aallaqqaataani ammaanneqaqqissaaq, Naalakkersuisoqarfik taama nalunaaruteqarpoq.
Inatsisartunulli ilaasortat marluk tamanna naammaginngilaat.
Qaleralinniarnerup unitsikkallarneqarnissaa nalunaarutigineqariartorlu, Partii Naleqqap siulittaasuata Hans Enoksenip Kristian Jeremiassenillu Siumumeersup ataatsimoorlutik tusagassiorfinnut nalunaaruteqarput Upernavimmi qaleralinniarnerup unitsikkallarneqarnissaa akerleralugu.
- Ukiorisseruttornerani Upernaviup eqqaani qaleralinniarnerup unitsinneqarnera akuersaarneqarsinnaanngilaq, parteeqatigiissimasut taama allapput, ukiullu taamaalinerani kiassarnermut aningaasartuutit qaffasissut innersuussutigalugit.
- Ilaqutariit meerartallit annertuumik eqqornerlunneqartussaapput, taamaammallu Hans Enoksenip Kristian Jeremiassenillu Naalakkersuisut inappaat qinersinermi neriorsuutitik eqquutseqqullugit Upernaviullu eqqaani umiatsiaararsorluni qaleralinniarneq piaarnerpaamik ammaateqqeqqullugu.
