Upernavimmi pisiassat akii qaffakkaluttuinnarput

Karoline Rosing oqaaluttuarpoq, pisisartut arlaliullutik akinik eqqumiiginnillutik pisiniarfiup ittuanut saaffiginnittarsimallutik.

- Pisiassanut, ukioq tamaat timmisartukkut tikisitanut, akigitittakkani atortippai, assersuutigiinnarlugu iipili 6 koruuneqartarpoq. Pisiassanut timissartukkut tikisitanut akigitinneqartut nikinngillat, naak umiarsuarmik tikittoqareeraluartoq. Immussuaq, ukioq tamaat 53 koruuni sinnilaannguarlugu akeqartartoq, ippassaq pisiaraara 80,95 koruuninik akeqalersimasoq, Karoline Rosing oqarpoq.

Upernavimmi atuisut sinniisaasa siulittaasuata, Samuel Mørch-ip, isornartorsiutit ilisarilluarsinnaavai. Taanna oqarpoq, saaffiginnitoqartarnera tungavigalugu atuisut sinniisaat qanittukkut ataatsimiissasut.

Pilersuisoq A/S-ip ataatsimik kukkussuteqarsimallutik nassuerutigaat.

- Ilumoorpoq, immussuarmik aalajangersimasumik maanna tuniniagaqaratta, kukkunitsigut sikuuneranik akimik, tassalu 80,95 koruunimik akilersorsimagatsigu.

Soorunami 54,95 koruunimut iluarsereerparput, kisianni immussuaq taanna aatsaat tuninialerparput, Pilersuisoq A/S-p pisortaa, Lars Behrend, KNR allalluni akivoq.

Nangilluni allappoq, immussuaq, Karoline Rosing-ip eqqartugaa, Pilersuisoq A/S-ip sikuunera tamaat tuninianngikkaa, annermik qerisunik aammali qerisuunngitsunik arlalialunnguanik immussuaateqarsimallutik.

- Iipililli eqqarsaatigalugit ukioq tamaat naliginnarmik aki, tassa 5,95, akigitipparput. Sikuunerani aki akigitissimasinnaagaluarparput, taamaalioratali. Maanna taama akeqarput, aammali 3,95 koruunilinnik tun iniagaqarluta, Pilersuisoq A/S-ip pisortaa, Lars Behrend, KNR-imut akivoq.