Upernavimmi nuna sajuppoq

Upernaviup kujataatungaani immap iluani nuna sajussimasorineqarpoq, tamanna sapaatiummat ulloqeqqata kingorna nalunaaqutaq marlup missaani pisimavoq.

Aalisartup umiatsiaminik angalasup qannguluppaluk tassanngaannaq tusaasimavaa, pasitsaallugulu, imaluunniit misigalugulu, ataatungimininngaaneersoq. Ilimatsakkaluarpoq ujaqqat qaqqamiit sisoorujussuartut imaluunniit ilulissamik aserortoqartoq, nunali misissoraluaramiuk ujaqqanik sisoortunik malunnartorsinngilaq, eqqaanilu iluliaqarani.

Taamaattoq immami puaasarnerujussuaq takuvaa, umiatsiaminillu kilometerinik marlunnik ungasitsigisumi pujorsuaq qernertoq immamiit qummukartoq takullugu.

Upernavimmi politiassistenti, Niels Peter Krogh, Radioaviisimut taama oqaluttuarpoq.

Aalisartoq apuukkami misigisani oqaluttuarai, ilisarisimasaalu ataaseq politiinut saaffiginnippoq.

Pisoq allanit aamma takuneqarsimavoq, Upernavimmilu innutaasut arlalissuit oqaluttuarput, qannguluppalussuaq suunersoq nassuiarsinnaanngisartik sapaatiummat nalunaataq marlup missaani tusaasimagitsik.

Immap iluani sajunnerugunartoq Upernaviup kujataatungaani Akiani pivoq.

Sapaatiummat putsumik takusimasinnaasut Upernavimmi politiinut saaffiginneqquneqarput, politiit oqarasuaataat 96 12 22.