Upernavimmi innuttaasut: Tarrup ataani inuuvugut

Innuttaasut aqqusinermi qullilersuisoqarnissaata utaqqinarnerujussua naammagiunnaarpaat, ingammik illoqarfiup immikkoortortaani nutaanik 30-nik illuliorfiusimasuni najugaqartut.

- 2007-p kingorna saaffiginnittuarpunga akissutisiaralu taannaajuarpoq, tassa kommuni Namminersorlutik Oqartussat aningaassaliissutissanut akuersinissaanut utaqqimmat. Maanna innuttaaqatikka kajumissaarusuppakka maalaaqqullugit, ukioq manna tarrup ataani inooqqikkusunngikkunik, taama oqarpoq Cecilie Mathæussen, illuliorfiusuni nutaani najugalik.

Qaasuitsup Kommuniani Upernavimmi sanaartornermut avatangiisinullu immikkoortortami pisortap, Vitalius Løvstrømip, Cecilie Mathæussenip saaffiginnissutai uppernarsarpai oqarluni utaqqineq suliassap pisariuneranut peqqutaasoq. Suliassaq kommunalbestyrelsimut ingerlaqqaartarpoq, kingornalu Namminersorlutik Oqartussat aningaasaliissutigisinnaanerlugu aaliangertarpaat.

- Qujanartumik Namminersorlutik Oqartussat akuersissutigeqqammerpaat, nunaminertassamillu qinnuteqaat Ilulissanut nassiuteqqammerparput innuttaasut illuliorfinni nutaani qulleqalerneruniassammata, Vitalius Løvstrøm neriorsuivoq.

Tamatumalli tungaanut innuttaasut tarrup ataani ingerlasariaqartassapput.

- Unnukkut angerlaraangatta qaammartartulisartariaqartarpugut, Cecilie Mathæussen naggasiivoq.