Upernavimmi imeq amigaataavoq
Upernavimmi taseq imeqarfiusoq imaarutilermat imeq Upernavimmiut ileqqaartariaqalerpaat.
Illuni suliffeqarfinnilu imermut tankit sapaatip-akunneranut marloriarlutik pingasoriarlutilluunniit imermik immerneqartaraluarput. Maannakkulli sapaatip-akunneranut ataasiaannarlutik immerneqartalerlutik. Taamaalilluni sapaatip-akunneranut imissaarutissanngikkaanni sipaarnissaa pisariaqarpoq.
- Kollegiani najugallit sapaatip-akunninngortumi uffarsinnaanngillat, Gaabannguaq Petersen Kollegiani nakkutilliisuusoq oqarpoq.
Nukissiorfiit siorna ikuallammatali Upernavimmi imeqarniarnikkut ajornartorsiortoqalerpoq. Tamatuma kinguneranik illoqarfimmiut ukiumi ataasinngulersumi imeq qalaqqaartarpaat. Maannalu nittaalaqannginnerata sialoqannginneratalu kinguneranik tatsip imeqarfiusup imaarutilernera illoqarfimmiunut ajornartorsiortitsilerpoq.
Louise Johansson Nukissiorfinniit ilisimatitsivoq, imermik pilersuinerminni Upernavimmi imermik akuiaammik ikkussuiniartoq. Taamaalilluni imaq immamit akuiarneqarluni imerineqarsinnaalissalluni. Taamaattorli taartissaq amigaataasoq illoqarfimmut apuunneqareerpat aatsaat imermik tamakkiisumik pilersuisoqarsinnaalissalluni.
