Upernavimmi Atuarfik Prinsesse Margrethe atuartunut ipadsinik tunniussisoq
Upernavimmi meeqqat atuarfianni Prinsesse Margrethep atuarfiani atuartut tamarmik ipaditinik tunineqassapput.
Meeqqat ipaditinik tunineqarunik nuannaarnissaat atuarfimmiit naatsorsuutigineqaraluartoq, meeqqat natsorsuutigisamit eqqissisimanerusimapput.
- Ipadit agguaaneqarmata, atuartut nuannannissaat naatsorsuutigigaluarpara. Klassilli ilaanni tamanna malunnarpallaanngilaq. Atuartut ilaasa namminneq pigisaminnik ipadeqareernerat peqqutaasimagunarpoq, atuarfimmi pisortaq, Nuka Sørensen oqarpoq.
Ipadit agguaanneqareeraluartut aasaanerani atuanngiffeqareernerup kingorna atuartitsinermi aatsaat atorneqartalissapput.
Atuartut ilinniartitsisullu Ipadip atuartitsissutigineqartalernissaanut aasaanerani atuanngiffeqarnermi sungiusarnissaat pilersaarutaavoq.
Taamatut agguaaneq Avannaata Kommuniata atuartitsinermik digitalinngorsaarusuttup periusissiaanut ilaavoq.
Ilulissani meeqqat atuarfii marluk marsimi agguaassiffigineqarput, Uummannammilu aamma taamaaliortoqarluni. Qanaami ukiaru agguaasoqarnissaa naatsorsuutigineqarpoq. Tamatumalu kingorna nunaqarfiit tulliunneqassallutik.