Upernavik timersortarfittaarpoq

Upernavimmi timersortarfik nutaaq inuppassuit peqataaffigisaaannik ullumi atoqqaarfissiorneqarpoq.

Timersortarfittaaq Upernavimmut pingaaruteqartorujussuanngussaaq, meeqqat inuusuttullu susassaqartinniarneqarnerannut atorluarneqarsinnaammat.

Upernaviup kommuneani sunngiffimmi susassaqartitsiniarnermut pisortaq Konkordie Zeeb taama oqarpoq:

- Siunissami sunniutissaa assorujussuaq pingaaruteqartutut takorloorparput. Meeqqat inuusuttuaqqallu timersortuugamik, arsaattarfillu ataasiinnaalluni. Siunissarissaartorsuanngorput. Nuannersorsuarmik illutaarput, Konkordie Zeeb oqarpoq.

Timersortarfittaaq timersorneriinnarmut atorneqassanngilaq. Konkordie Zeeb-ip oqaatigaa eqqumiitsuliortut allallu timersortarfik aamma atorluarsinnaassagaat:

- Timersortarfiinnarmik siunertaqannginnami. Eqqumiitsuliortut assigiinngitsut, pinaveersaartitsinerit allallu. Timersortarfiup imai sorpassuupput, Upernaviup kommuneani sunngiffimmi susassaqartitsiniarnermut pisortaq Konkordie Zeeb oqarpoq.