Upernavik suli kollegiaqanngilaq

Upernavimmi atuartut ineqarfiat suli amigaatigineqarpoq. Upernaviup kommuneqarfiani ukiuni arlalinngortuni atuartunut ineqarfissaaleqinermik ajornartorsiuteqarneq, atualernerit tamaasa utertarpoq. Upernavimmi ukioq manna atuarfiusoq aallartimmat meeqqat nunaqarfinneersut katillutik 62-iusut ilaasa 30-it missaanniittut inissaqartinniarnerat aamma ajornartorsiutigineqarpoq.

Upernavimmi atuartunut ineqarfissaaleqiuarneq Kullorsuarmi atuarfiup pisortaata Sven Nielsenip naammagiunnaavippaa.

- Atuartut ineqarfissaaleqiuarnerat Ilinniartitaanermut Pisortaqarfimmit ukiuni arlalinngortuni ilisimaarineqarpoq. Namminersornerullutik Oqartussat ineqarfiliortitsinermut akisussaasut manna tikillugu annertunerusumik suli iliuuseqanngillat, pitsaasumillu inissaqartitsinnginneq pissutaalluni nunaqarfinneersut ilarpassui atuarnerminnik unitsitsiinnartarput, taamaalillutillu ilinniagaqanngitsoortarlutik, Sven Nielsen allappoq.

Ineqarfissanik aaqqiiniarneq pissutigalugu Upernaviup nunaqarfianeersut septembari aallartilaarpat aatsaat atualissapput.

-Ajornartorsiut kommunep sulipallanneratigut qaangertuusivarput-aasiit. Illut pingasut ineqarfiungallassapput, taamaattorli atuartut ineqarfeqalernissaat suli kissaataavoq. Karoline Rosing Upernavimmi atuarfiup pisortaa oqarpoq.

Upernavimmi atuartunut ineqarfiliornissaq Namminersornerullutik Oqartussanit qangali pilersaarutigineqartarpoq, ineqarfissap ilusissaa pillugu massakkumut arlaqalersunik titartagaqarpoq maannamulli suli piviusunngortinneqanngitsunik.

Inatsisartut aappaagumut inatsisissaattut siunnersuusiami allassimavoq sinerissami ilinniartut ineqarfissaannut aningaasat 13,8 millioni koruunit ukiunilu tulliini 32 millioni koruunit 27 millioni koruunillu immikkoortinneqartut. Taamaattoq ineqarfissanut aningaasanik immikkoortitsinerit sukumiinerusumik nassuiaaserneqarsimanngillat.

Upernavimmi atuartunut ineqarfissaaleqiuarneq pillugu

Ilinniartitaanermut naalakkersuisoq Doris Jakobsen oqaaseqartinniaraluaratsigu iluatsinngitsoorparput.