Upernavik Seafoodimi sulisut 210-t suliffissaarutissapput
Aalisarnermut, Piniarnermut Nunalerinermullu Naalakkersuisoqarfiup Upernavimmi eqqaanilu qaleralinniarneq tamaat oktobarip ulluisa qulingiluaanni unitsippagu, Upernavik Seafood A/S-imi sulisut 210-t suliffissaarutissapput.
Qalerallit tamarmik - Upernavimmi eqqaanilu nunami tunitsivinnut tunineqarsimasut - suliarineqarnerat naammassisimallunilu umiarsuakkut sapaatip akunneri marlussuit qaangiuppata nassiussorneqareersimanissaat Upernavik Seafoodip naatsorsuutigaa.
Tassalu imaappoq nioqqutissiorfinni sulisut tamarmik Upernavik Seafoodimit oktobarip ulluisa 19-ianniit soraarsinneqartariaqassapput, - tassalu sulisut 210-t eqqugaassallutik.