Upernaakkut ataatsimiinneq ullumi aallartissaaq: Tamanna partiit qilanaaraat
Aalajangiiffigisassatut siunnersuutit 56-it. Inatsisissatut siunnersuutit 14-it. Aamma oqallisissatut siunnersuutit 25-t.
Taakku partiinit tallimanit qinikkat 31-t Upernaakkut ataatsimiinneq ullumi aallartippat oqallisigisussanngussavaat.
Siumumi siulittaasup tulliata, Vivian Motzfeldtip takornariaqarnermut siunnersuutimi oqallisigineqalernissaa qilanaaraa. Taanna takornarialerisut nunaqavissut salliutinneqarnissaannut tunngavoq.
Assi: KNR
Taassuma oqarnera naapertorlugu takorialerisut nunami allamiunit pigineqartut kalaallinik sulisoqarneq ajorput.
Takornariat taamaalillutik kalaallinik sulisunik atuinatik nunami allamiunit takornariartitsisunit angallanneqartarput. Tamanna akunnittarfinni angalaarnerniluunniit pisarpoq.
- Nunaqavissut amerlanerusut takornariartitsinissamut akuersissutigineqarpata taava najugaqartut piginnittutut aamma misigilersinneqassapput. Tamanna inatsisitigut qulakkeerneqassaaq, Vivian Motzfeldt oqarpoq.
Assi: KNR
Atassummiillu Aqqalu Jerimiassenip nunatsinni innuttaasut akileraarutigisartagaat sumut atorneqartarnersut paaserusuppaa.
Kisitsisit annerusut
Upernaakkut ataatsimiinneq ullumi aallartissaaq taannalu maajip ulluisa 20-ata tungaanut ingerlassalluni.
Ullut ataatsimiiffiusussat katillugit 20-upput.
Partiinit tallimanit qinikkat katillugit 31-upput.
Taakku Aalajangiiffigisassatut siunnersuutit 56-it, Inatsisissatut siunnersuutit 14-it, aamma oqallisissatut siunnersuutit 25-t oqallisigissavaat.
Apeqqut taanna Aningaasanut inatsit atuarnissaa eqiaginngikkaanni akissutissarsineqarsinnaagaluarpoq. Taannali 600-nik qupperneqarpoq, Aqqalu Jerimiassenilli akileraarutit sumut atorneqartarnerannut naannerusumik takussutissaqarnissaa kissaatigaa.
- Nunatsinni akileraarutit sumut atorneqartarpat? Taannalu maannakkumut ersarissarneqarnerunissaa, innuttaasumuna akileraartartup sumut aningaasat akileraarutini ingerlasarnersut paasisinnaalissagaa. Taamannak siunnersuummik peqaratta neriuppugullu taanna arlaatigut putoqqutsinneqarsinnaassasoq, Aqqalu Jerimiassen oqarpoq.
- Maannakkut aningaasanut inatsit taamaallaat qiviarsinnaavarput. Taannalu kialluunniit atuaraluaruniuk takeruttormat immaqa paasisassai annikissinnaapput, kisiannili skattekortikkut takusinnaalersinnaagaanni qupperneq ataasinnguami tassa taanna anguniagarivarput, innuttaasunut paasiuminartumik inissisimalernissaa.
Akileraarutinut akilititsinnit assersuutigalugu peqqinnissaqarnermut, ilinniartitaanermut isumaginninnermut, inuussutissarsiutit ineriartortinneqarnerannut sanaartornermut aningaasartuutinut qanoq annertutigisoq akiliutigisarneripput sukkasuumik takusinnaalersinnaagutsigu tamanna sulinissamut kajuminnerulersitsillunilu inuiaqatigiinni oqallinnermut peqataarusussuseqarnerulersitsissasoq taassuma qularutiginngilaa.
Assi: KNR
Naleqqamit Jens Napaattuup kia kalaaliuneranik oqallinnerup aallartinneqaqqinnissaa qilanaaraa.
Tamanna siusinnerusukkut qaqinneqareernikuuvoq, Inatsisartunilu siorna oqallisigineqartussaagaluarluni upernaakkut ataatsimiinnissamut kinguartinneqarpoq.
- Uagut pissanganartillugu oqaluuserisassanngortitarput ilaat kina kalaaliua? Qilanaarisorujussuuarput isummersorfigineqarnissaa.
- Taanna akiuminaatsinneqartarmat, aamma minnerunngitsumik allamiuluartut ilaanni saatinniarneqartarmat.
Kina qallunaajuamik aperigutta tamanna ajornaatsuuvoq, tassungami sinaakkutinik inatsiseqareerpoq, kisianni kina kalaaliua taanna silaannarmiikkunnaarnissa qilanaarinerpaasatta ilagivaat.
Danskisut innuttaassuseqaruit aamma angajoqqaatit aanakkutillu danskiunngikkunik/savalimmiormiuunngikkunik imaluunniit nunanit allanit nuussimasuunngikkunik/meerarsiaanngikkuit taava kalaaliunissat ilimanarluinnarpoq.
Inuit Ataqatigiit nunatta aningaasaqarnerata killiffia pillugu nalunaarusiaq maajip ulluisa 19-ianneersup oqallisigineqarnissaa qilanaarigaat, IA-mi siulittaasup tulliata, Agathe Fontainip oqaatigaa.
Assi: KNR