Upernaakkut ataatsimiilerneq ilimagisatut pissanganartoq

Inatsisartuni oqaaseqarnissamut piffissaliussat ilinnut qinersisartumut pingaaruteqarput, qinikkat inatsisinik aalajangersaanerminni atugassaannut killiliisuummata.

Oqaaseqarnissamut piffissaliussat maanna atuuttut sivitsorsaanissamut periarfissiivallaarnerarlugit ukiarmi isornartorsiorneqarnikooqaat, upernaakkullu ataatsimiinnermi aamma taama pisoqaqqunagu, Siuliottaasoqarfiup inassutigaa, siunnersuut ullup ataatsip ingerlanerani naammassineqassasoq. Tassalu Inatsisartut suliassavimminnut saatsigatik siunnersuut ullumi siullermeerlugulu, aappassaanerlugulu pingajussaaniissavaat.

Siumut isumaqarpoq, oqaaseqarnissamut piffissaliussanik allanngortitsiniarneq suleriaatsimik unioqqutitsinerusoq.

- Inatsisartuni suleriaaserput unioqqutinneqarpoq. Suleriaasitsinnik allannguissagutta, siunnersuutip siullermeerneqarneraniit aappassaaneerneqarnissaanut pinngitsoorani ullunik pingasunik akunneqartussavoq, Siumup siulittaasua Aleqa Hammond oqarpoq.

Kisianni Inatsisartuni amerlanerussuteqartut akerlianik isumaqarput. Siunnersuut ulluni suliffiusuni pingasuni uninngateqqanngikkaluarlugu, oqaaseqarnissamut piffissaliussat allanngortinnissaannut ilasortat 17-it taaseqataapput.

Malittarisassat suli allanngortinneqanngillat, Siumullu periarfissani atorluarlugu, isummatik uteqattaarpaat.

Taamaaliornerallu malittarisassanik allanngortitsinissap pisariaqassusiannut takussutissaaginnartoq, Inuit Ataqatigiit siulittaasuat Kuupik Kleist isumaqarpoq:

- Sinnersuummi siunertaavoq, naalakkersuinikkut siunnersuutit imarisaat annerusumik oqallisigineqartalissasut. Neriuppungalu, suleriaatsip allanngortinneratigut tamanna tikissagipput, oqaluuserisallu qanoq isikkoqarneranik imaluunniit periuseqarnermut tunngasut siunissami annikinnerulissasut. Taamaalillutik naalakkersuinermut tunngasut annertunerusumik ataatsimiittarfimmi sammineqalissallutik.

Siulittaasoqarfimmi ilaasortat, partiini annerni sisamaneersut, tamarmik isumaqatigiillutik siunnersuut isumaqatigaat. Siunnersuut isikkussamisut isikkoqartillugu Inatsisartut ataatsimiinnissaannut nalunaaquttap akunneri sisamaata affaa sioqqullugu nassiunneqarpoq.

Tamannalu Aleqa Hammondip isornartoqarteqaa.

- Suleriaatsip allanngortinnissaa akuersissutigisinnaanngilarput, partiikkuutaarluta tamatta nalilersorluarnissaanut periarfissinneqannginnattaluunniit, ataatsimiititaliamulluunniit innersuunnissaanut periarfissineqarata.

Siunnersuut siullermeerlugu oqaluuserineqareerpoq, matumalu allaaserinerani suleriaaseq pillugu ataatsimiititaliamit suliarineqarluni. Taanna Siulitaasoqarfimmit aammalu Kattusseqatigiit Partiiata Inatsisartuni ilaasortaatitaanit inuttaqarpoq.

Siumut sinnerlugu ilasortat siunnersuutaat pingasut, oqaluuserisassanut ilanngunneqarsimanngitsut, ilanngutsineqarnissaat taasissutigineqarmat amerlanerussutillit itigartitsissutigaat, 19-it naaggaarmata, Atassutip ilaasortaatitai pingasut taakkununnga ilaallutik.