Upalungaarsimanermut pilersaarutini saqqummiukkusunngilai

- Uuliamik maqisoortoqaratarsinnaaneranut upalungaarsimanermut pilersaarutissi inussiarnisaarlusi saqqummiunnissaat apequtilliissutigaarput, uuliasiornissi isumannaatsuunera taamaalilluni arlaannaannulluunniit attuumassuteqanngitsunit uppernasineqarniassammat. Greenpeacep umiarsuaaniit Esperanzamiit Cairn Energyp qillerivissuanut Leiv Eirikssonimut radiokkut issatsiaq saaffiginninneq taama nipeqarpoq.

Pinngortitamik illersuiniaqatigiinneersut qillerivissuarmut qaninnerulertut ilisimaneqarpoq. Tassani ilaasortat marluk Leiv Eiriksonip ataani ullut sisamassaat annanniummiipput.

Greenpeacellu iliuutsiminut tunngavilersuutaasa pingaarnerpaat ilagilluinnarpaa - taakkua issuarlugit "Cairn Energyp uuliamik maqisoortoqarsinnaaneranut upalungaarsimanermut pilersaarutini saqqummiukkusunngimmagit".

- Inuiaqatigiit kalaallit tusarumasariaqarpaat, tuluit naalakkersuisuisa naliliinerannut Cairn Energy qanoq illuatungiliiniarnersoq, illersuiniaqatigiit Leiv Eiriksonimut qallunngilaattaa allapput.

Tamanna pivoq Greenpeacemiit oqarnerattut, uuliamik issittup imartaani maqisoortoqassagaluarpat salinnissaa ajornartoq, atorfillit tuluit silap pissusaa nukissiuuteqarnerlu pillugu ministeriannut mailikkut ersersereeraat.

Cairn Energylli kalaallit Greenpeaceluunnit allamik neriorsorsinnanngilai taamaallaat oqarluni, uuliasiortitseqatigiiffiup paasinninnera malillugu, taamannak ajutoortoqaratarsinnaaneranut pilersaarutitik inuit tatigisinnaagaat.

- Uagut aalajangigassarinngilarput. Pilersaarutit taakkua saqqummiunneqassanersut saqqummiunneqassannginersulluunniit kalaallit oqartussaasuia aalajangertussaavaat, Cairn Energyp inatsisilerinermut niunernermullu pisortaa, Simon Thomson, oqarpoq.