Upalungaarsimanermi pisortat: Nuummi Sisimiunilu siggartaassuarni kukkunerit aaqqinneqarput
Nuummi ajunaalernermik kalerrisaarut oktobarimi appimmat teknikkikkut kukkuneruvoq, Sisimiuni sapaatip akunnerani kingullermi aamma taama pisoqarpoq.
Qatserisarfiit taakku ukiuni kingullerni nutaanik atortorissaarutitaarnikuupput, teknikkikkullu ajutoornerit tassannga aallaaveqarput.
Kukkunerit taakku aaqqinneqartariaqartut kommunini marlunni upalungaarsimasut pisortaasa oqaatigaat.
AAMMA ATUARUK Sisimiuni innaallagissamik qamittoorneq siggartaassuup aallartinneranut pissutaasoq
Sisimiuni ajunaalernermik kalerrisaarut qamittoortoqarnerani aallartittoq Qeqqata Kommuniani upalungaarsimasut pisortaata, Ole Kreutzmannip oqaatigaa. Taama pisoqaraangat atortorissaarutit pisortamut nalunaaruteqartartussaapput, teknikkikkulli ajutooqqaneq pissutigalugu siggartaassuup aallartinnissaanut nalunaarut ingerlatinneqarpoq.
Ajunaarnersuaqarnerani kalerrisaarut aallartippat imaaliussaatit:
Siggarnera siulleq: 'Iserit'
Nippakkiartoriarluni nipikilliartortoq . Siggarnera sekundini 45-ni sivisusseqartoq sisamariarluni uterneqassaaq.
- Taava isissaatit, matut, igalaat silaannarissarfiillu matussavatit.
- KNR TV-mi radiomiluunniit paasissutissanik misissuigit.
- Siggartaatip aappaa utaqqiuk: 'Navianartoq qaangiuppoq'.
- Pisortat KNR TV-kkut radiokkulluunniit navianartorsiornermik qaangiuttoqarneranik nalunaaruteqarnissaat utaqqiuk.
Siggarnerata aappaa: 'Navianartoq qaangiuppoq'
Sivisuumik siggartitsitsineq sekundinik 45-nik sivisussusilik.
- KNR TV imaluunnit radio navianartup qaangiunneranik nalunaaruteqarpoq.
- Maanna illup iluanit aneqqissinnaalerputit.
Tusarfik: Upalungaarsimanermut ataatsimiititaliaq
- Tamanna aaqqiiffigineqarpoq, taamaammat taama pisoqaqqinnissaa naatsorsuutiginngilarput, upalungaarsimasut pisortaat oqarpoq.
Nunatsinni qatserisarfinni qassiiusuni nutaanik atortorissaarutilersuisoqarnikuuvoq.
Sisimiuni Kangerlussuarmilu oktobarimi nutaanik atortorissaarutilersuisoqarpoq.
Siggartaat minutsini qassiiusuni siggartartoq
Nuummi atortorissaarut nutaaq siorna atulerneqartoq aamma ajornartorsiortitsivoq.
Nuummi oktobarip 27-anni atortorissaarummi kukkuneq pissutigalugu siggartaat aamma appippoq.
AAMMA ATUARUK Kalerrisaarut aallartittoortoq: Nuummiut ilaasa tusaanngitsooraat
- Atortorissaarutitsinni nutaami aallarteqqammernermi ajornartorsiuteqalaarnikuuvoq, Knud Petersen Nuummi upalungaarsimasut pisortaat oqarpoq.
- Pisiortorfigisatsinnut saaffiginnilluta tamanna aaqqiissuteqarfigivarput, taakku erngerlutik misissuipput kukkussutaasorlu aaqqiiffigalugu, Knud Petersen oqarpoq.
Upalungaarsimasut pisortaata oqarnera naapertorlugu qatserisartut atortorissaarummik pisiffigisaq erngertumik attaveqarfigaat taakkulu teknikkikkut kukkunerusoq paasivaat.
- Neriuppunga taama pisoqaqqissanngitsoq. Maannakkut ajunngitsumik ingerlavoq. Ullaaq manna (sisamanngorneq aaqq.) atortorissaarut ajunnginnersoq pisiortorfitsinnut misissortippara, pissusissamisullu ingerlavoq Knud Petersen oqarpoq.
Taassuma siggartaatit appikkaangata qatserisartut qatserisarfiliarnissaannik toqqaannartumik nalunaarfigineqartarnerarpai. Qatserisartulli siulliit minutsialuit qaangiuttut takkunnissaannut kalerrisaarut siggartarpoq.
Suliaatsimut ileqqoreqqusat tusaatissatut tiguneqartoq
Siggartaat appikkaangat politiit isumaminik kalerriisaarisartumit nalunaarfigineqartarlutillu upalungaarsimasunit toqqaannartumik attavigineqartartut, upalungaarsimasut pisortaat marluk nassuiaapput.
Siggartaatit innuttaasut illup iluaniinnissaannut radiomillu tv-millu ikitsinissaannut kalerrisaarutaapput. Tusagassiorfiillu innuttaasunut susoqarneranik qanorli iliuuseqarnissaannik paasissutissiisussaapput.
Nuummili Sisimiunilu siggartaatit appinneranni nalunaaruteqartoqanngitsoq, KNR-imi pisortap, Karl-Henrik Simonsenip oqaatigaa.
- Nalunaarummik tigusaqaraangatta maani sulisut kalerrinneqassapput, taava innuttaasunut siggartaatip appiffigisaaniittunut ajunaalernermik kalerrisaarutip appinnera pillugu qanorlu iliussanersut radiokkut nalunaarutigisussaavarput, KNR-ip pisortaa oqarpoq.
- Upalungaarsimasut nalunaaruteqartussaapput, tamatumalu kingorna iliuuseqassaagut. Radiokkut minnerpaamik nalunaaruteqassaagut aammali nittartagaq siunissami atorumaarlutigu, Karl-Henrik Simonsen oqarpoq.
Taamaattoqassappalli KNR ilisimatinneqartariaqartoq, KNR-ip pisortaata erseqqissaatigaa.
Illoqarfinni marlunni politiit innuttaasut susoqarneranik paasiniaallutik sianeqattaartut nalaappaat. Kalaallit Nunaannilu Politiit siggartaatip kukkusumik appinnera pillugu Facebookikkut nalunaaruteqareernissaata tungaanut sianeqattaartoqaannavippoq.
Nunap immikkoortuani kujataani vicepolitiinspektørip politiit, KNR, annaassiniarnissamillu upalungaarsimasut kalerrisaarutit Sisimiuni Nuummilu appinnerat tunuliaqutaralugu upalungaarsimanermik nalunaaruteqartoqartarnissaa pillugu suleriaatsimik ileqqoreqqusamik isumaqatigiissuteqartut paasissutissiissutigaa.