Unnummi Kulturisiorfimmi KNR-imut pulaarit

Nuummi KNRip suliffeqarfiani isertut angallanneqassapput immikkoortortaqarfiillu ilisaritinneqassallutik. Takornariarneqarsinnaasut ilagaat KNR TV-ikkut aallakaatinneqartartup nutaap inuusuttut silarsuaata sullivia.

TV-ikkut nutaarsiassanik aallakaatitsivimmi Qanoroorumi nutaarsiassanik atuaasuusaartoqarsinnaavoq radiomilu nipilersukkat qanoq tulleriaarneqartarnerat misilittarneqarsinnaallutik. KNR-imi nutaarsiassanik suliaqarneq pillugu KNRmi nutaarsiassaqartitsivimmi pisortamut Johannes Mathiassen-imut apeqqutigineqarsinnaapput, soorluttaaq KNR-imi pisortaq Ivalo Egede KNR-ip kantiinani kaffisoqatigalugu oqaloqatigineqarsinnaajumaartoq.

Unnummi Kulturisorfimmi KNRi takuniarneqarsinnaavoq unnukkut arfineq marluniit qulit tungaanut. Unnummi kulturisiorfimmi takuniarneqarsinnaasut nittartakkami www.kulturnat.gl -imi alakkarneqarsinnaapput.

Nittartakkami tassani sinerissami illoqarfinni assigiinngitsuni unnummi kulturisiornermi aaqqissuussinerit takuneqarsinnaapput.