Unnuap qeqqaniit timmisartuussisoqarunnaassaaq

Taama timmisartortartut isumaqatigiinniartuat, Toni Rytkønin KNR-imut ilisimatitsivoq.

- Immitsinnut avissaarpugut. Isumaqatigiissitsiniartartup paasivaa isumaqatigiinniaraluarnerit taamatinneqartut, sulisitsisumillu mattussineq pilersaarutigineqartutut atuutilissaaq, Toni Rykønin oqarpoq.

Taassuma ilisimatitsissutigaa isumaqatigiissitsiniartartoq pissutissaqarsorisimanngitsoq isumaqatigiinniarnerit nanginneqarnissaanut, illuatungeriit imminnut ungasippallaaqimmata.

- Pakatsissutigaarput Air Greenlandip siunnersuutigisaraluagut naammagalugit tigunngimmatigit. Akuersaarniarsimagaluarpagut, tamannali naammassimanngilaq, Toni Rytkønin oqarpoq nangillunilu:

- Neriuppugut isumatusaarnerulerumaartut, pitsaasumik isumaqatigiissuteqarniassagutta.

Air Greenlandip sulisuminik mattussinera ingerlaannassappat, sulisut qaammatip ataatsip qaangiunnerani iniminnit anisinneqassapput.

Air Greenlandi aqagu sapaammi timmisartuussinissaminik pilersaaruteqanngilaq, ataasinngorpalli timmisartuussinissat 65-it, suluusalinnik aamma qulimiguulinnik, 1200-t missaannik ilaasoqartussat eqqugaassapput.

Timmisartuussinissaraluani unitsinneqartussanili ilaasussat eqqorneqartut Air Greenlandimit attavigineqassapput.

Oqarasuaatikkut toqqaannaq saaffiginnittarfiit marluk aqagu sapaammiit atuutilissapput. Sapaammilu ammatinneqassalluni ualikkut nalunaaqutaq marluniit unnukkut qulip tungaanut. Ataasinngornermilu ullaakkut nalunaaqutaq arfineq pingasuniit unnukkut arfineq pingasup tungaanut ammatinneqassalluni.

Tamatuma saniatigut Air Greenland nittartakkamini pisut kingulliit pillugit ullormut marloriarluni nutaarsiassiisassaaq.