Birna pillugu suliaq Unnerluutigineqartup arnaq kunissimagaa

Birna Brjánsdottirip toqutaaneranut pasisap Polar Nanumi inuttaqatiminut oqaluttuaraa arnamik kunissisimalluni. Birna Brjánsdottirip unnummi toqutaaffiani tamanna pisimasoq oqaatigineqarpoq. Pasisap Polar Nanumi inuttaqataata eqqartuussivimmi ippassaq ataasinngornermi tamanna nassuiaatigaa.
Allattoq Sara K. Jakobsen
aggustip 22-at 2017 08:15

Arnap Islandimeersup toqutaaneranut eqqartuussineq Reykjavikimi ippassaq aallartippoq, Polar Nanumi inuttaq kalaaleq toqutsisimasutut unnerluutigineqarluni.

Unnerluutigineqartup Polar Nanumi suleqataa eqqartuussivimmi ippassaq ataasinngornermi nassuiaatinneqarpoq. Arnaq biilit aappaluttut unnerluutigineqartup januaarip ulluisa 14-ianni attartorsimasaani ilaasoq kunissorsimallugu, angutip unnerluutigineqartup suleqatiminut oqaluttuarisimagaa eqqartuussinermi nassuiaasup oqaatigaa. Birna Brjánsdottir unnuk taanna periarfeerunneqarpoq.

Unnerluutigineqartup politiinut siusinnerusukkut nassuiaatigaa arnaq unnuk taanna kunissorsimallugu, taamatulli nassuiaateqarnera ippassaq ataasinngornermi allaaneruvoq, arnarmi kunissorsimanagu oqarami.

Kalaaleq angut toqutsisimasutut unnerluutigineqartoq suliap ingerlanerata tamaat pinngitsuunerarpoq, pinngitsuuninilu ippassaq eqqartuussinermi attappaa.

Arnap Islandimeersup toqutaaneranut atatillugu eqqartuussineq ullumi nanginneqassaaq.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq