Unnerluussissut ingerlateqqinneqanngilaq

Nuummi politimesterip tullersortaa, Morten Nielsen nalunaarpoq aallakaatitassiornermi inatsisaatsuliortoqarsimanera uppernarsarneqarsinnaanngimmat unnerluussissut ingerlateqqissinaanagu.

Inunnik isumaginnittutut atorfillip kinaassusaa aallakaatitassiami takuneqarsinnaammat niviarsiaqqallu qarliinngasup assersornagu isiginnaagassiarisimanera pillugu Nuup Kommuneani inunnik isumaginninnermut pisortap, Vibeke Møller Jensenip aallakaatitassiortut unnerluutigigaluarpai.

Danmarks Radiop piviusulersaarusiorfiani atorfilik Poul-Erik Heilbuth oqarpoq unnersuussigaluarnerup taamaatiinnarneqarnissaa iluarisimaarlugu.

Danmarks Radio aamma nalunaarpoq aallakaatitassiaq taannarpiaq nunani avannarlerni TV-kkut aallakaatitassiallammattut nersornaasigassatut innersuutigisimallugu. Nersornaat marsip arfineq aappaani Hotel d´Angleterremi tunniunneqartussaavoq.