Unitsitsiinnartoqartarnerujussua sammineqarpoq
Misissuinerup inernera 2011-p qaammataasa siulliit pingasut ingerlaneranni piariissasoq, Demokraatineersup Niels Thomsenip paragraf 36 naapertorlugu apeqqutaanut Ilinniartitaanermut Naalakkersuisoq, Mimi Karlsen, taama ilisimatitsivoq.
Inuusuttut ilinniagaqartut agguaqatigiissillugu 26 procentii ilinniakkaminnik unitsitsiinnartarput.
Uniinnartarnerit akiorniarlugit aningaasanut inatsimmi ukiut tamaasa aningaasaliisoqartarpoq, uniinnartarnerillu ikilisinniarlugit suliniutit ersarissut aningaasalersornissaannut ilinniarfiit taakkunannga qinnuteqarsinnaallutik.
Uniinnartarnerit annikillisinnissaat, ilinniartitaanikkut pilersaarut naapertorlugu sulisinnaasut 2/3-liisa 2020-mi ilinniarsimasuunissaannik anguniagaqarnerup angunissaanut pingaaruteqarluinnartut, Mimi Karlsenip Niels Thomsenimut akissummini nassuerutigaa.
