Uniornerit akisuut

Sisoraaserlutik ooqattaasartarut sekundinik pingaaruteqaqisunik annaasaqartarput unioraangamik. Tamannalumi pissutigalugu Ruslandimi VM-rtoqarnerani siulliit 100-ut akornanniinngitsooqqipput.

Marlunngorneq marsip arfineq pingajuat 20 kilometerimut unammisoqarpoq norskeq Tarjei Bøe ajugaavoq 20-riarluni igeriarnermini ataasiaannarluni uniorluni. Tamannalu imaannaanngitsuuvoq eqqoriagaq tennisip arsaaraatut angitigisoq 50 meterisut ungasitsigalugu nakatarneqartarmat.

Kalaallini Øystein Slettemark angusarissaarnersaavoq normu 108-nngorluni. Igeriarnernili 20ni arfineq pingasoriarluni uniornini assut kinguarsaatigaa sisorarnermini ingerlalluaraluarluni.

Kristian Kristoffersen napparsimareerluni pitsanngoriartorpoq sukkanerpaajusumit minutsinik arfineq marlunnik kigaannerulluni. Taanna 20-riarluni igeriarnermini arfineq marloriarluni uniorpoq katinneranni Øystein Slettemarkimit sekundinik 30nik kigaannerulluni normu 111-nngorpoq peqataasunit 123-nit..

- Pakatsissutigaara ukioq igeriaqattaarluarnera attassinnaasimannginnakku, taama Kristian Kristoffersen oqarpoq.

Inuusuttunnguaq Aqqaluartaa Olsen kalaallini sisoraatinik ingerlalluarnersaagaluarpoq taamaattorli aqqanileriarluni uniornini assut kinguaarsaatigaa taamalu normu 115-nngorpoq.

- Nalunngilara takutitannit pitsaanerusumik takutitsisinnaagaluarlunga pingaartumik igeriartarneq eqqarsaatigalugu. Ilimagaara pitsanngoriarsinnaallunga unammersuarnerni annertuuni peqataasarnikkut, taama Aqqaluartaa Olsen oqarpoq.

Kalaallit VMqataanerat tamaanga killeqarpoq. VM-li ullut tulliuttut ingerlaqqissaaq angutit iligiiaarnerat tallimanngorneq marsip aqqarngat ingerlanneqassalluni.