Unioqqutitsiuarput
Piniarnermut alisarnermullu nakkutilliisut, aasaq manna ulapputigisaanut ilaapput eqalunnik aalisartunik nakkutiginninneq. Kangaatsiami aalisarnermut piniarnermullu nakkutilliisoq, Hansinnguaq Martinsen oqarpoq, nakkutilliisut naammattuukkajukkaat qassutit atorlugit unioqqutitsilluni eqalunnik aalisartoqarnera.
- Kuup akuata 150 miiterit iluani qassusersorneq ajornartorsiutaanerusarpoq. Qassusersornermi naammattoortakkagut taakkuukkajunnerupput. Inuit unioqqutitsillutik qassusersortarnerat sumik patsiseqarnersoq naluara, kisianni ilimagaara inuit nalunngikkaluaraat, 150 miiterit qaangerlugit inatsit. Aamma qassutit piginnittup angallatilluunniit atianik ersittoqartussaavoq, Hansinnguaq Martinsen oqarpoq nangillunilu: - Qassutinik unioqqutitsisunik naammattuuigaangatta, inuttaalu pissarsiarisinnaanagit, taava suliassaq politiinut ingerlateqqittarparput, amerlanertigullu qassutinik piginnittut qassutiminnik amusinissaat piumasarisarparput. Aammali naammattoortakkatsinnut ilaapput qassutit qimaannakkat, sivisulaartumik nivinganikut. Aalisagartaat soorunami asiusarput. Kisianni eqalunniarfiit akuttukujukkamik, taamaattunik takusarnerput akuttuvoq, kisianni eqalunniarfiit nalaani tamatigut taamaattunik naammattuuisarpugut.
Kangaatsiami piniarnermut aalisarnermullu nakkutilissoq Hansinnguaq Martinsen taama oqarpoq.
Nunatsinni aalisarnermut piniarnermullu nakkutilliisut katillugit 16-iupput.
