Unioqqutitsisut pillarneqarsinnaanngillat
Inatsisilerituut naliliinerat najoqqutaralugu, Inatsisartut suleriaasiat imaluunniit Inatsisartut pillugit aamma Naalakkersuisut pillugit, Inatsisartut inatsisaat unioqqutitsillutik taasisarsimasunut pillaasinnaanissamut periarfissiinngilaq.
Immikkut ilisimasalik inatsisilerinikkut misissueqqullugu qinnuigineqartoq Leif Senholt ilaatigut allappoq, ‘paasissutissiissutigineqartut tunngavigalugit, inatsisartunut ilaasortat kortimik taasinerminni atugassaminnik tunineqarsimasut, uppernarsaallutillu atsiorsimasut akisussaassuseqanngitsumik iliuuseqarsimasut.
Allanik taasissussineq tassaanerarneqarpoq, ilaasortap nammineq taasisinnaatitaanermi saniatigut taasisinnaanermik allamik unioqqutitsilluni pissarsiniarsimaneratut.
Aammattaaq Nunatsinni Danmarkimiluunniit pinerluttulerinermi inatsisini, qinikkatut sulinermi taasinernut atatillugu inatsisitigut maleruagassaqassaqanngilaq.
Taamaattorli pisimasut Inatsisartut ukiakkut ataatsimiinneranni ilungersunartorsiortitsisimasut, Ruth Heilmannip nassuerutigaa, oqaatigalugulu taasinermi maleruagassanik unioqqutitsinertut pisut sakkortuumik uparuassallugit Inatsisartut Siulittaasoqarfiat pissutissaqartoq.
Pisimasup kinguneranik, ilaatigut Inatsisartut taasisarneranni maleruagassat sukateriffigineqarput, oqaatigineqarluni maleruagassanut akerliusumik taasisitsinermut atortut ingerlaannartumik paasineqanngitsumik atoqqinneqarsinnaanissaat ilamanaataaruttoq.
Soorluttaaq Siulittaasoqarfiup suliniuteqarneratigut Inatsisartut Suleriaasiannik allanngortitsisoqarpoq, tamannalu ukiortaamiit atuutilissaaq.
Allannguinermi pineqarpoq, Inatsisartuni ilaasortaq suleriaatsimik unioqqutitsisimasoq, Inatsisartut Siulittaasoqarfiannit ulluni ataatsimiiffiusuni 14-ini akissarsiaqarani tunuartitaasinnaalermat.
