Unioqqutitsisut kikkuuneri oqaatigerusunngilaat
Namminersorlutik oqartussat inuussutissalerinermik nakkutilliisoqarfiata Nuummi misissuinerani paasinarsivoq politiinut tunniussisoqartoq.
Maleruagassanillu unioqqutitsisuusut pineqartut sorliunersut Namminersorlutik Oqartussani atorfeqartup uumasut nakorsaanerata Mads Thor Madsenip oqaatigerusunngilai.
- Oqaatigisinnaanngilarput kikkut politiinut tunniunneqarsimanersut. Taakkumi inuuniutigivaat, eqqartuunneqanngillallu suli. Eqqortumik maleruaasimannginnerannik aaqqitassaat aaqqereerpagut, politiinullu tunniullugit. Tassa maanna politiit eqqartuussiviullu suliaq isumagissavaat, uumasut nakorsaanerat Mads Thor Madsen oqarpoq.
Suliaq pillugu manna Nuummi politiit misissuileruttorput, eqqartuunneqassappatalu pisinniarfiit aqqi kingorna aatsaat avammut saqqummiussinnaallugit.