Unioqqutitsilluni arfanniarneq kingunerlussinnaavoq

Unioqqutitsilluni arfanniartarneq takornartaanngilaq. Atuagagdliutit-ni sisamanngornermi saqqummersumi erserpoq arferit toqorariarlugit timaat qimaannarneqartarsimasut.

Namminersornerullutik Oqartussat aappaagu arfattassiissutinik IWC-lu isumaqatigiinniartussaapput. Aalisarnermut piniarnermullu pisortaqarfimmi pisortaq Amalie Jessen ima oqarpoq:

- Unioqqutitsilluni arfanniartoqartarnera akuersaarnanngilluinnarpoq. Namminersornerullutik Oqartussat IWC-lu arfattassat pillugit aappaagu isumaqatiginninniartussaapput. Nunani assigiinngitsuni arfattassiissutit qassiussanersut biologit aalajangertarpaat, kisianni isumaqatiginninniarnermi arfanniartoqartarsimanera IWC-miit isiginiarneqartarput, Amalie Jessen Qanoruumut oqarpoq.

Unioqqutitsilluni arfanniartarneq kommunimut eqquisarpoq.

Namminersornerullutik Oqartussaniillu suliniuteqartoqartarpoq unioqqutitsilluni arfanniartarneq akiorniarlugu.

Unioqqutitsilluni arfanniartoqarsimappat aappaagumut pisassiissutit ilanngaavigineqarsinnaapput piniartullu akiliisinneqarsinnaallutik.

Tamannali naammannersoq Namminersorneullutik Oqartussanit apeqquserneqarpoq. Unioqqutitsilluni arfanniarsimasut sukannernerusumik iliuuseqarfigineqartalernissaat eqqarsaatersuutigineqarpoq:

- Inatsisit arlaleriarlugit unioqqutinneqarsimappata piniarnermut allagartap arsaarinnissutigineqarsinnaanissaa periarfissatut isigaarput, Aalisarnermut Piniarnermullu Pisortaqarfiup pisortaa Amalie Jessen Qanoruumut oqarpoq.