Uninnganermi akip qaffatsinneqarnera KANUKOKA-mit naammagittaalliutigineqarpoq

Inuit napparsimavinni uninngatinneqartarnerisa akiata qaffatsinneqarnera kommuninut akisuallaalissammat, KANUKOKA allakkanik ammasunik, naalakkersuisunut saaffiginnissuteqarpoq.

Inuit napparsimavimmi isumagisariallit uninngatinneqarneranni ullormut akiliutaasartut ullumikkut ulloq aallarnerfigalugu qaffatsinneqarput.

Qaffaanerit millionerpassuarnik kommuninut ataasiakkaanut naleqarsinnaasoq, KANUKOKA allappoq.

Taamaammat kommunit peqqissutsimut naalakkersuisumut Asii Chemnitz Narup-imut piumasaqarput akit pillugit kaajallaasitaq taamaateqqullugu.

Akit pillugit isumaqatiginniarnerni kommunit peqataatinneqarsimanngillat, Namminersornerullutillu oqartussat akinik qaffaanissaq aalajangiusimappassuk, kommunit piumasaqarput aningaasat bloktilskuditut taallugit agguaanneqartartut kommuninut qaffanneqassasut.

KANUKOKA-p allagai ammasut aningaasaqarnermut Naalakkersuisumut, Josef Motzfeldt-imut aamma nassiunneqarput.