Ungasianiit gassimik pilersuutissaaq aallartiinnaqaaq

Schröder suliniummut russinit sulisinneqarpoq, Ruslandimi illoqarfimmi Wüborgimi nivaattap nalliuttorsiorpalaartumik maggunneqarneranut takkussimasut Schröderip pilluaqquvai. Najuuttunut ilaavoq Ruslandimi præsidenti.

Nordstream Ruslandimut EU-mullu attaveqaataassaaq, inoqutigiillu 25 millionit gassimik pilersorsinnaalissallugit.

Politikerilli europamiut ernummatigaat Nordstream pissutigalugu EU Ruslandimut atavallaalissasoq.

Gassi russit suliffeqarfiutaata namminersortup Gazpromip EU-mut tunniuttassavaa, tamannalu Danmarkip Radioata Ruslandimi ilanngutassiortorisimasaata, Henrik Lærke-p, ernumanartoqartippaa:

Uulia naturgassilu Ruslandimut pingaaruteqartorujussuupput, niuernermilu politikkip akuunissaa russit isumanerluutiginngilaat.

Nunanut allanut politikkip avammut saqqummiunniarneqarnerani naturgassimut ledningi sakkuliunniarunikku taamaaliussapput, soorlu ledningi Ukrainemukartoq siornaakkut matuneqartoq, naturgassimut aki Ukrainep akilernianngimmagu, Henrik Lærche oqarpoq.

Ukrainep Ruslandillu akornanni politikkut isumaqatigiinngittoqarnera matumani aamma pissutaaqataavoq.

Uuliasioqatigiiffik Gazprom nunanut allanut ministereqarfittut ilaatigut aamma taaneqartarpoq, Henrik Lærche oqarpoq, Ruslandimi oqartussat Gazpromip siulersuisuini ilaasortaatinneqarnerat tikkuarlugu.

Gazprom sakkutut atorneqarpoq.