Unammisitsinikkut tartulersitsiniarneq oqallitsitseqisoq
Hollandimiut tv-kkut aallakaatitassiaatigut inuit pingasut tartulerneqarnissaminnik unammisinneqarnerata inuup allap timaata atortuanik napparsimasunut nuussilluni atortuliisarnermik Hollandimi oqallinneq sakkortuumik aallartippaa.
Inuit tartuminnik allatigulluunniit timiminni atortuminnik tunniusserusussinnaasut amigaataaqimmata, taamaammallu EU-Kommissionip inuit timimi atortuinik tuniserusussinnaasut amerla-nerusut pisariaqartinneqarmata perusuppai.
Hollandimi inuit atortuinik inunnut napparsimasunut nuussilluni ikkussisarneq ulluni makkunani tusagassiu-titigut oqallissutaaqaaq, oqallisaaneralu EU-mi nunanut saniliinnut aamma tuniluuppoq.
Hollandimi tv 3-kkut allaalluinnartumik aallakaatitsisoqarmat, inuit pingasut tartulerneqarnissaminnik utaqqisut allakaatitami arnap tartuata illuanik tartunnanniutsinneqarlutik unammisinneqarsimapput.
Tv-kkullu isiginnaartartut sofami isiarusaajutaa sms-kkut sorliup tartunnattaarissaneraa arnaq tartunnatitsisussaq ikiorlugu qinersisinneqarput. Aallakaatitassiarlu politikerinit inunnillu oqalliseqataasunit ileqqorluttuliornertut nalilersorneqarluni uparuartorneqarpoq kusanaagineqaqalunilu.
- TV-kkut allakaatitassiortup angutaasup uparuartorneqarnerminut tunngatillugu uparuartuisut ilumoornerarluinnarpai.
- Uangataaq isumaqarpunga isumassarsiaq akueriuminaatsoq, siunissami taamatut aallakaatitasioqqissanngilagut, BNN-mi aallakaatitassiornermi pisortaq taama oqarpoq.
Hollandimili inuit napparsimasut amerlagaarmata inuup timaata atortuinik tuniserusussinnaasunik pissarsiorneq ajornagaarmat allatut ajornartumik oqallitsitinissaq aallartinniarlugu taamaaliortoqartariaqarsimavoq.
Bruxellesimi EU-kommissionimi oqaaseqartartoq oqarpoq; Hollandimiut taamatut aallakaatitassiaat akuerineqarsinnaanngilluinnartoq.
EU-mi peqqinnissamut kommisærip inuup timaanik tunisisinnaasut amigaataanerat isumaqataaffigaa.
Ippassarlu peqqinnissamut kommisærip siunnersuutigaa inuit peqqikkallartillutik siumut aalajangereertariaqaraat, toqugunik timimik atortui inunnut nappaateqartunut tunniunneqarsinnaaneri inooqataaffigisinnaanerat,
imaluunniit naamik.