Unammillerneq aatsaat aallartippoq

Timmisartuutileqatigiiffiit allat Atlantikoq qulaallugu Kalaallit Nunaannut timmisartuussisalernissaat Air Greenlandip ukiup ataatsip ingerlanerani piareerfigisimavaa.

Naak Nunatta Danmarkillu akornanni timmisartuussinissaq Cimber Sterlingip pilersaarutini taamaatikkallaraluarai, Air Greenlandimut sunniuteqangaarnavianngitsoq, Air Greenlandip pisortaanera Michael Binzer oqarpoq:

- Sunniuteqarnavianngilaq. Iliuusissatut pilersaaruterput allanngornavianngilaq. Aasaru aappaagulu aasakkut aamma unammillerteqalernissarput naatsorsuutigalugu iliuuseqassaagut. Timmisartukkut angallassinermi pissutsit taamaapput. Cimber Sterlingilli ukioq manna timmisartuussiniannginnera tusaatissatut tiguinnassavarput, timmisartuutileqatigiiffiillu allat Nunatsinnut timmisartuussisalissanersut pissanngatigiinnassallugu, Air Greenlandip pisortaanera Michael Binzer Radioaviisimut oqarpoq.

Islandikkoorlugu Air Icelandip timmisartuusserusunnera taassuma eqqaasitsissutigaa, Nunatsinnut Nunatsinninngaanniillu timmisartuussisarnissaq pillugu unammillernerup maanna pioreersup ingerlaannarnissaa aamma naatsorsuutigalugu.

Unammillerteqalersinnaanissamut Air Greenland piareersimajuaannassasoq Michael Binzer oqarpoq, unammillernerli naapertuilluartuliorneq najoqqutaralugu ingerlasariaqassanerarlugu.