Ilaasortaateeraq Tikeraaq inunnik 8-nik ilaasoqarluni arfininngormat unnukkut arfineq-marlunut Nuuliarniarluni aallarami marloriarluni ikkarlippoq. Tikeraap nalinginnaasumik akunnerit arfineq-marluk atortarpai, tamatumuunali akunnerit 14-t atorneqartariaqarsimapput,
Ilaasut ilaat Lona Johnsen uinilu Qeqertarsuatsiaanut feriarnertik navianartorsiornermik naggaserpaat.
- Akunnerit marluk sinnerlugit ingerlareerluta ikkarlerujussuarpugut, pingasoriarluta tammingaatsiaqaluta. immattoorsimassasoralugu assut annilaangagaluarpugut qujanartumilli immassimanngilaq.
Anorlileriarmat qatsorsiillugu akunnerni tallimani aamma uninngasimapput.
- Kisaqanngilaq Aasiaallu radio-anut attaveqarsinnaanngilaq, akunnernilu tallimani uninnganitsinni radio-kkut attaveqanngiivippugut. Silammut matu ammaruminaatsorujussuuvoq, pisoqariataassagaluarpallu ammarneq ajulersimassagaluarparput, Lona Johnsen oqaluttuarpoq.
Aallaqqikkaluarlutik aamma tassa ikkarleqqissimapput.
- Ilaasut nilliallutillu annilaangasorujussuupput misigisaq ajorluinnarpoq, Lona Johnsen oqaluttuarpoq.
Taassuma Imarsiornermi qullersaqarfk attavigisimavaa, taakkulu suliamik ingerlatitseqqikkumasimapput.
Tikeraami aquttoq aalakoorsimanngilaq.