Umimmaat ummiutilerpaat
Kangerlussuup avannaani ukiukkut umimmanniarneq januaarip ulluisa 15-ianni aallartissaaq, marsip ulluisa qulingat tikillugu pissalluni. Qeqqata Kommuniata nittartagaani tamanna atuarneqarsinnaavoq.
Allattoq Jaaku Lyberth
Umimmaat 390-it Namminersorlutik Oqartussanit ukiuunerani pisassiissutigineqarput.
Piffissami tassani killilikkamik pisassiisoqarnera pissutigalugu akuersissummik qinnuteqartitsisoqassaaq.
Ukiukkut umimmanniarsinnaanermut qinnuteqarfissaq aqagu sisamanngornermut, januaarip ulluisa qulingannut nalunaaqutaq marlunut killeqarpoq.
Qinnuteqartut akornanni makitsineqassaaq, qinnuteqartullu amerlassusii apeqqutaatillugit akuersissutit qinnuteqartunut ataasiakkaanut pisassiissutit amerlassusilerneqassapput.
Ilisimatitsissutigineqarpoq umimmanniarsinnaanermut qinnuteqarsinnaasut piniarnermut allagaqartaqassammata.