Umimmaat neqaat bakteriaqarsimapput
Umimmaat neqaannut tunngatillugu Greenlandic Lipid Solutions A/S-ip akuersissummik qinnuteqaataa Naalakkersuisut suliaraat. Suliffeqarfiup nersutit nakorsaannit akuersissutit akuerineqarsimasut eqqanaarsimanngimmagit umimmaap neqaanik suliaqarnissaminut akuerineqarsimanngilaq
Inatsisit Nersutinut nakorsaqarfiup malillugit suliffeqarfiup tuniniaannginnissaa toqqarpaa, neqillu inuussutissat isumannaatsuunissaat pissutigalugu kasiileqqullugit.
Ilumulli neqit inunnit nerineqarsinnaanersut paasiumallugu Naalakkersuisut suliffeqarfik periarfissippaat umimmaat neqaannik pineqartunik misissuinissaanik.
Bakteriaqarsinnaanerannik misissuinerup inernerisa nassatarisaanik neqit Nersutinut nakorsaqarfiup inunnit nerineqarsinnaanerat akuerisinnaasimanngilaat. Taarsiullugulu Naalakkersuisut innersuussutigaat neqit qimminut nerukkaatissatut atorneqarsinnaanerannik suliffeqarfik qinnuteqassasoq. Kalaallit Nunaanni inatsisit malillugit uumasut piniagassat neqaannik aamma aalisakkanik tuniniaasinnaaneq marlunnik periarfissaqarpoq, tassa piniartuuneq aammalu inuussutissat isumannaatsuunissaat eqqarsaatigineqarsimallutik.
Kalaalimineerniarfinni neqit aalisakkallu qerinngitsut poortorneqanngitsullu tuniniarneqarsinnaapput. Taama tuniniaaneq inuussutissat pillugit inatsisini immikkut akuersissutaavoq, piniartoqarneq eqqarsaatigalugu najukkani pissutsinut tulluarsarneqarnikuulluni. Kalaalimineerniarfimmi pisiniap neqi pisiani nammineq akisussaaffigaa, piniartup atuisartullu akornanni tatigeqatigiinnermik aallaavilik. Allarluinnaavorli nerisassanik tunisassiorfeqarneq.
Neqit poortorneqareersimasarput nillataartillugit imaluunniit qeritillugit tuniniarneqartarlutik. Poortoriikkat pisiarilertinnagit atuisartunit nalilerneqarsinnaasanngillat. Neqimmi pisiniarfinni tuniniarneqartartut eqqiluisaarnerup tungaatigut annertuumik piumasaqaateqarfigineqareerput.
Neqit pisiniarfinni tuniniarneqartut inuussutissatigut toqunartoqalersimasut innuttaasunut amerlanernut annertuumik kinguneqarnerlussinnaasarmata piusaqaatit sakkortusarput.
Umimmaallu neqaat misissorneqartut bakterissanik inummut napparsimalersitsisinnaasunik, soorlu stafylokokkinik Enterokokkinik aamma termotolerante coliforme bakterissanit mingutsinneqarsimanerat, assersuutigalugu neqip annamit mingutsinneqarsimaneranik takutitsivoq, taakkumi bakterissat nalinginnaasumik neqini nassaassaanngillat.
Suliaq maannakkut pisoq aammalu siusinnerusukkut Kalaallit Nunaanni misissuisimanerit aallaavigalugit Naalakkersuisut inuussutissat pillugit aalajangersakkat atuuttut misissorneqarnissaat aamma aallartinniaraat, Namminersornerullutik Oqartussat ilanngullugu ullumi nalunaarutigaat.
