Umimmaarniarsinnaaneq inatsisartunngortussat aalajangiiffigissavaat

Inatsisit Nunatsinnut naleqqussarneqarnissaat Amaasa Olsenip maanna piumasaraa, taamaaliortoqalersorlu uumasut nakorsaata Mads Thor Madsenip oqaatigaa.

- Uumasut nakorsaattut atorfinikkama Suliffeqarfiit inuussutissaleriffiusut pillugit Namminersornerullutik Oqartussat nalunaarutaannik nutarterinissaq suliassama siullersaasa ilagaat, taamaaliortoqareerporlu. Peqqussut nutaaq piareeqqavoq, naalakkersuisunngorumaartussallu inatsisartunngorumaartussallu akuereqqaartariaqassavaat, Mads Thor Madsen oqarpoq, nangillunilu:

- Qinikkat qanoq aalajangiiumaarnersut utaqqivarput, umimmattalli aggoriikkat qerisullu kalaaliaqqani tuniniarneqarsinnaanissaat periarfissaalissaaq, umimmattallu tuneriaannanngorlugit suliarineqareersinnaanissaat aamma periarfissaalissalluni. Kalaaliaqqamiilli suliffeqarfinnut, hotelinut neriniartarfinnullu tuniniaasinnaanissaq killeqassaaq, inuinnarnullu tuniniaasoqarsinnaassalluni, uumasut nakorsaat Mads Thor Madsen Radioaviisimut oqarpoq.

Umimmaat neqaat to tonsit Amaasa Olsenip maanna pigimmagit igiinnassanerai Mads Thor Madseni aperigatsigu ima akivoq:

- Inatsit maanna atuuttoq naapertorlugu umimmaap neqaa qerisoq ilaquttaminut allanullu tunissutigisinnaavaa. Kalaaliaqqamiit tuniniarsinnaanngilaa neriniartarfinnut pisiniarfinnut assigisaannullu aamma tunisinnaanagu, immikkulli akuersissummik Namminersornerullutik Oqartussanut qinnuteqaateqarsinnaavoq. Amaasa Olseni attaveqarfigigakku tamanna ilisimatitsissutigaara, uumasut nakorsaat oqarpoq.

Amaasa Olsenip kipiluttunartutut isigaa neqit to tonsit tunisinnaannginnamigit, Mads Thor Madsenilli apeqqusernartoqartippaa inatsit tunngavigineqartoq 1998-imili atuummat Amaasa Olsenillu tamanna eqqarsaatigisimannginneraa.