Umimmaap neqaa mattuallaarneraraa

Umimmaap neqaanik pitsaasumik Danmarkimiit piniartarneq ukiut kingulliit ajornakusoornerulersimasoq, neriniartarfiup NOMA-p misillerfigaa, taamaammallu piniaqqinnissartik tunitsiviup toqqissisimanerulernissaanut utaqqissullugu.

Neriniartarfimmi NOMA-miippugut nunat tamalaat akornanni nerisassiullaqqissuutut tusamasaasumi. NOMA novembari 2003-imili Illu Atlantikumi inissisimalersimasoq isikkivigilluinnartumiippoq. Nyhavnip akinnguaniippoq isiginnaariartarfissuarlu nutaaliarsuaq Operaen neriniartarfiup igalaaviniit takuneqarsinnaavoq.

NOMA-p ilisimaneqaatigaa nunat avannarliit pissarititaanik atuilluni nerisassiortarnini Nunatsinniit umimmaap neqaanik piumaneqaqisumik piniartarneq aallartisarnerup nalaani ajornartorsiutitaqarsimanngilaq. Ukiulli kingulliit NOMA-p maluginiarsimavaa tunitsiviup allanngorarnerata kingorna piniartarneq ajornakusoornerulersoq.

- Kingullermik tigusatta piitsaassusaa sungiusimasatsituut pitsaatiginngilaq, siornatigullu toqqaannartumik tunitsivinnut sianertaraluarpugut piniarluta, maannali ajornakusoornerulersimavoq, taamaammat piniaqqinnginnitsinni eqqissiimisoqarnissaa utaqqimaarparput, neriniartarfimmik piginneqataasoq igasullu ittuat Rene Redzepi oqarpoq. Nangipporlu:

- Neqi tikittut marluk kingulliit tassa umimmaap affaata neqaa tikisitaraluarput atorsinnaasimanngilarput mattuallaarmat, tamanna arlaleriarlunga siornatigut misillerfigisareerpara.

Politikenip nerisassianik naliliisartuata ukiut pingasungajaat matuma siornatigut umimmak mattuallaaq ooqattaarpaa, ajoraluartumillu ullorissanik sisamaannarnik taamani pissarsivugut, taamaammat neriniartut pitsaalluinnartunik akiusunut naleqquttunik sassaallerfigiumaneruagut, tassa umimmaap neqaa nalunngisatsitut aqitsunnguullunilu mamartuusariaqarpoq,

Rene Redzepi oqarpoq.

Arctic Green Food oqaaseqartinniaraluarparput pissarsiarisinnaasimanngilarpulli.