Umimmaap neqaa 1,2 mio. koruuninik nalilik tunineq ajulerpaat

Tuttut umimmaallu neqaannik piniartut tunisisarnerat piffissami septemberimiit februari ilanngullugu ingerlanneqartarpoq. Uumasullu nakorsaata piffissami taama sivisutigisumi ataavartumik nakkutilliisinnaasannginnera pissutigalugu, ilitsersuusiarineqartoq sakkugalugu, neqit pitsaassusaannik nakkutilliineq suliffeqarfiup pisortaanit akisussaaffgitinneqartarpoq, ulloq mannamut ajornartorsiutitaqarsimanngitsumik. Uumasulli nakorsaa nutaaq atorfinimmat tatigeqatigiilluni suleqatigiinneq kipivoq. Kinguneranik umimmaap neqaa 20 tonsi 1,2 millioner koruuninik naleqartoq ingiinnarneqartussanngorpoq. Pissutaasutuarlu tassaavoq uumasup nakorsaata isimik nammineq umimmaap neqaanik takusimannginnera.

Uumasup nakorsaata Maniitsumilu suliffeqarfiup tatigeqatigiillutik suleqatigiinnerisa kinguneranik tuttup neqaa katillugu 40 tonsi siorna Maniitsumiit sinerissap sinneranut tunineqarpoq ajornartorsiutitaqanngitsumik. Ukiormannalu tuttup neqaa 35 tonsi tuniniarneqalereeraluarpoq. Tunisassiornermut pisortaq Brian Vind oqarpoq umimmaap neqaa uninngasuutigilingartik tunisinnaanngikkunikku sullivitsik matuinnartariaqassasoq.

Umimmaap neqaa nioqqutigineqarsinnaajunnaarmat Greenlandic Lipid Solutions A/S-mi sulisut 13-t suliffeerukkallarput.

Uumasut nakorsaa juullisioriarluni Danmarkimiittoq oqaaseqartinniaraluaratsigu iluatsinngilarput.