Umiatsiat uuliamik assartuummit annaanneqartut

Taama oqaluttuarpoq Upernavimmi politeeqarfimmi ulluinnarni aqutsisoq, Esra Berthelsen.

Umiatsiat taakkua marluk anorlerluni persertorsuugaa ajornartorsiulersimapput. Aappaa motoriminik unittoorluni tissukalersimavoq, aappaalu perserneranit sumiiffeerunnermini Aappilattup eqqaani nunamut oqquiartortariaqarsimavoq.

Upernavimmi politiit ajornartorsiortoqarneranik tallimanngornermi decembarip pingajuani kalerrinneqaramik erngerlutik ujaasineq aallartippaat, uuliamik assartuut Orasila ikiorsiullugu.

Umiatsiaaqqap aappaa, Q-17-eq, sisamanik inuttaqartoq, Naajaat eqqaanni motooriarsimalluni tissukarpoq. Qujanartumillu VHF radioa iluaqutigalugu uuliamik assartuutip toraarlugit erngerluni ornissinnaasimavai, ujarneqalerneranniillu nalunaaquttap akunneri marluk qaangiuttut Naajaanut oqqullugit. Tassanngaanniit Orasila Aappilattup tungaanut inunnut arfineq marlunnut sumiiffeeruttunut ujaasiartorluni ingerlaqqippoq.

Sumiiffeeruttut arfineq marluk umiatsiamik poca 505-imik angallateqartut, Upernavimmiit Kangersuatsiap tungaanut ingerlaartillutik perlunnerata kinguneranik sumiissuseerussimapput, taamaaligamillu Aappilattup eqqaani nunamut oqquiartorsimallutik. Taakkua piffissap ilaatigut Orasilap qullii takusinnaalersimavaat, mobilikkullu politiinit innersuunneqarnertik malillugu, angallamminnik umiarsuaq ornissimavaat, umiarsuarmiillu Upernavimmut oqqunneqarsimallutik.