Piniartut sikkussaaqqasut ikiorneqartut
Issittumi Sakkutooqarfik Facebookimi ullumikkut taama allaaserisaqarpoq.
Annaassiniartoqarnissaa pinngitsoortikkumallugu, umiarsuaq alapernaarsuut Knud Rasmussen umiatsianut tallimanik inuttaqartunut aallartinneqassasoq sapaatiummat ualikkut aalajangiunneqarpoq.
Knud Rasmussen anngummat umiatsianiittut tamarmik ajunngillat, umiatsiallu umiarsuup ingerlavigisaatigut aallaqqaammut malinnaasinniarneqaraluarput.
Sikkussaapallappulli, umiatsiallu tallimaasut umiarsuarmut qaqinneqassasut aalajangiunneqarpoq.
Umiatsiat qaqinneqareermata Knud Rasmussen Attup tungaanut aallarpoq, umiatsiallu niuneqarput piniartullu ajoratik angerlarsinnaanngorput.
Issittumi Sakkutooqarfiup aamma erseqqissaatigaa piniartut aallannginnerminni piareersaatigisassatik tamaasa eqqaamasimagaat.
VHF radionik, qummoroortitsissutinik kiisalu tupernik taqussanillu nassarput, Issittumi Sakkutooqarfik nersualaaraluni taama allappoq.
Knud Rasmussen ikiuinermi kingorna pilersaarutini malillugit angalanini nangippaa.
