Umiatsiaararsortut qaleralittassatik nungulerpaat
Umiatsiaaqqat ullutsinni ima aalisarluarsinnaatigilersimapput ilaatigut angallatiniit aalisartornerusinnaasarlutik. Qeqertarsuup tunuani qaleralittassat siornatut 8.000 tonsiupput. Taakkunannga umiatsiaararsortut pisassaat 3.379 tonsiupput maannalu tassa nungunneqarlutik.
- Umiatsiaararsortunut pisassiissutit paggatassiissutigineqarnikuuupput taakkulu ukiup sinneranut pisassaat maanna nungunneqarput, Kalaallit Nunaanni aalisarsinnaanermut akuersissutinik nakkutilliisoqarfimmi pisortap tullia Niels J. Laursen KNR-imut oqarpoq.
Qeqertarsuup tunuani umiatsiaararsortut arfininngorpat kingullermik tunisissaput. Qeqertarsuup tunuani pisassat 2011-mi 2012-milu 8.000 tonsiupput 2010-mi 2009-milu 8.800 tonsiusimallutik.
- Pisassat nungujaarnerannut pissutaavoq umiatsiaaqqat aalisarsinnaassusaat pitsanngoriarujussuarsimammat. Taakku ullutsinni hydrauliskinik innaallagissamoortunillu amooruteqarput ullup unnuallu ingerlaneranni arlaleriarlutik amoorsinnaallutik, Niels Laursen nassuiaavoq.
Aasarmannalu nunatsinni silaginnerujussua aalisartut atorluarsimavaat ulloq unnuarlu aalisarneq ullorpassuarni ingerlanneqartarsimalluni.
- Takusinnaavarput sapaatip akunnera kingulliinnaq umiatsiaaqqat 360 tons-inik tunisisimasut, Niels Laursen nassuiaavoq.
- Aalisartut namminneq aalajangersinnaavaat sumi qaleralittassanik aalisarusunnerlugit. Takorloorneqarsinnaavoq aalisartorpassuit Qeqertarsuup tunuanut aalisariaasimassasut unammilleqatigiinneq pissutigalugu tamaani tunisinermi akit qaffasinnerummata, Niels Laursen oqarpoq.
Avannarpasinnerusumi umiatsiaararsortut pisassaat aamma nungulerput. Kalaallit Nunaanni aalisarsinnaanermut akuersissutinik nakkutilliisoqarfik KNR-mut ilisimatitsivoq Uummannap eqqaani umiatsiaararsortut 3.730 tonsinik ukioq tamaat pisassaqartut maannalu pisassat sinneruttut 700 tonsiinnanngortut.
Upernaviup eqqaani umiatsiaararsortut 3.145 tonsinik pisassaqarput pisassallu sinneruttut 800 tonsiullutik.
Angallatit 6 meterimit anginerit suli pisassaqarput. Avannaa tamaat eqqarsaatigalugu katillugit suli 7.075 tonsiupput umiatsiaararsortut Qeqertarsuup tunuani, Uummannami Upernavimmilu katillugit 1.875 tonsinik pisassaqartut.
