Umiatsiaaqqamik angalasut marluk politiinit ujaarineqartut
Egede Sakariassen aamma Kaaka Joelsen, Qaqortumi maajip tallimaani nalunaaqutaq ualikkut pingasut missaani kingullermik takuneqartut Qaqortup politiivinit ujaarineqarput.
Politiit tusagassiorfinnut nalunaaruteqarlutik ilisimatitsissutigaat ujaarineqartut marluusut nunaqarfimmit Saarlumit qassusersoriartorlutik kangimut aallarsimasut.
Umiaatsiaaraq angallatigisaat tassaavoq With 400, 16 fodsi sungaartumik qalipaatilik tungujortumillu qulerualik tungujortunillu issiavilik. Mercurymik 40 hk-mik qernertumik motooreqarpoq. Politiit paasissutissaataat naapertorlugit ujaarineqartut VHF-radioqaratik aallarsimapput.
Ujaarineqartullu tungujortumik qalipaatilinnik atallaarsuaqarput sungaartunillu aappaluaartunik sialussiutinik qarleqarlutik.
Politiit SAR-imik ujaasititsipput, imaatigut silaannakkullu. Arfininngormat sapaatiummallu ujaasisoqarpoq umiaatsiaararli inuillu ujaarineqartut nassaarineqanngillat, politiit taama ilisimatitsipput.
Politiit maannamut paasiniaanerat naapertorlugu, ujaarineqartut kingullermik Qaqortumi maajip tallimaani 2017 nalunaaqutaq 15.00-ip missaani takuneqarput, kingornalu qanoq pisimanerat ilisimaneqarani.
Ujaarineqartut maajip tallimaata kingorna qanoq pisimanerinik ilisimasaqartut Qaqortumi politiinut oqarasuaatikkut 701122-kkut sianerlutik saaffiginnissuteqarnissaat politiinit kajumissaarutigineqarpoq.